今次我哋嘅目的地就係黑沙水庫！遊人們可以乘坐15、21A、26A、25號巴士於黑沙馬路或黑沙水庫下車便可。
而15號和21A這兩架巴士就會直接到達水庫入口，一落車沿著車站身後的這條小斜路走上去，不用5分鐘便能到達，相當之方便！
上完小斜路再抬頭一望，就會見到大大個黑沙水庫滑草場，重點是這個滑草場全是用真草，開放時間也只有周六和周日僅僅兩天，費用全免～遺憾的是開放對象是3歲以上，身高145cm以下的人……寶寶很想玩但寶寶不說……
仲記得周日晚播出的《玩盡澳門無限式》其中有位女主持人，未滑落去已經喊定先……我諗呢個滑草場一定唔係大家想像中咁簡單！！！強烈建議開放埋畀大人玩！
好啦～既然滑草冇大人份，不如走上少少，玩另一樣水上活動！咁玩另一個活動之前，我哋首先會經過一條小吊橋！
一見到呢條吊橋，就會諗起台灣某一個地方，唔知道讀者們會唔會同我一樣諗緊同一個地方呢？唔理啦！難得由城市嚟到郊外，梗係要喺呢度影番張相放上網呃like啦！
由橋頭影到橋尾，就會見到我哋嘅划艇水上活動！遊人們可以一邊划一邊欣賞山水連天的世外桃源，嚟過自我放逐，係咪冇諗過澳門可以咁玩呢～
嗱！老老實實，張相真係冇P過，個湖確實係綠色的！現場睇更加之靚！
今次大人終於有份玩了！以上畀番少少樂園資訊大家先，個人認為呢個項目對於一家大小、情侶甚至男女老少都十分之適合，可以做運動之餘，又可以欣賞到另一個澳門不一樣的風情畫！
但今次嚟嘅目的係登山！我哋繼續向上行！挑戰自己！但其實行嘅過程不太辛苦，沿路會有指示牌和一些小亭園提供畀大家。行山徑有多條，要視乎個人需要，短嘅半個鐘可以行完一圈，長則兩、三個鐘都有。
行下影下又一日～ 上到嚟仲可以飽覽路環四周的景色，例如遠眺路環市區、黑沙海灘等，澳門後花園之稱的路環果然名不虛傳！
想知更多關於澳門的新潮點，記得鎖定Eugene日常（跪謝）！