唔知大家仲記唔記得,細細個擁有屬於自己間睡房係咩感覺?起初我同父母瞓同一間房,後來老竇將屋企雜物室清空,變成我嘅睡房。雖然間房好細,除咗床同書枱就乜都冇,但第一次擁有屬於自己嘅小小空間,感覺好似好自由同好有自主權咁。

搬出去住「冇王管」,點知父母上到嚟彈三彈四

當人成長到某個年紀,就更加想有自己嘅私人空間。最近我搬咗出去租屋住,「冇王管」嘅感覺,比起以前有自己睡房爽快十倍。鍾意幾點瞓就幾點瞓,打機打到半夜又得,放假想hea到幾點出街食飯都冇人理。

搬出去住「冇王管」(圖片來源:《大叔的愛》)
搬出去住「冇王管」(圖片來源:《大叔的愛》)

但呢種「冇王管」狀態,只係維持咗幾個月,終於有次同父母飲茶之後,上咗嚟我屋企話想睇下。

點知噩夢就係咁開始!
開門第一句阿爸就講咗句:「乜間屋咁臭嘅?」
然後阿媽參觀廚房,一入到去就尖叫:「做乜唔洗碗啊?」
阿爸:「個廳部電視點會咁擺㗎?」
阿媽:「做乜堆衫仲唔洗啊?」
阿爸:「成間屋死氣沉沉咁,開窗簾啦!」
阿媽:「啲杯做乜唔洗啊?」

父母開始對我租嘅屋指三道四,一發不可收拾。講足半日後,阿爸將我嘅書枱同衣櫃重新搬過晒位置,阿媽就督促住我洗晒啲碗同衫。

本身只係諗住畀佢哋望一眼,坐低飲杯水就走,估唔到咁就忙足全日,老實講,我真係有少少嬲,所以我同佢哋講:「其實屋企係我嘅,我點樣住都唔關你哋事啦!」

搬出去住
(圖片來源:《明日如歌》劇照)

即使嘈交後,阿媽永遠都會主動關心你

當時我發誓以後都唔會畀佢哋再上我屋企!點知,一星期後有日突然收到阿媽電話,話一定要立即上嚟我屋企。

「但我唔得閒啊!好多嘢做,不如下次先!」我嘗試阻止。
「唔得啊!我攞住好多嘢,好重啊!」阿媽。
「吓!」
「落嚟先講啦!我去到你屋企樓下喇!」

我落到樓下,發現阿媽攞住一大個紅白藍膠袋。我心諗唔通佢咁老先學人離家出走,想搬嚟我度住?

原來,阿媽買咗一大堆日用品,話上次上完我屋企之後,發現乜都冇,所以買咗返嚟。有衣架、煮食用品、放污糟衫嘅洗衣袋,仲有一大堆生果……

「你記住食多啲生果啊!邊有人屋企個雪櫃空㗎!未洗嘅衫放入個袋,唔使周圍擺囉!仲有呢啲衣架畀你晾衫時用。」

諗深一層,其實阿媽都係關心我,我上次仲發佢哋脾氣。或者喺父母眼中,我永遠都係一個小朋友,無可否認,有啲父母的確係又煩又長氣。

但講到尾,呢個世界只有父母,會係「明知你嫌佢哋煩,都硬係要關心你」嘅人。

搬出去住
劇照(圖片來源:《阿媽,今晚食乜餸?》)

Tags :