【睡眠健康】睡眠是一天中很重要的一部分,成日返工返學都聽到人講:「我失眠」、「我好眼瞓」,大家又有沒有注意自己的睡眠質素?失眠固然是不好的,但「容易入睡」、「喺邊度都瞓得著」又係咪代表睡很好呢?日本精神科及睡眠專門醫生指,事實完全相反,仲有好嚴重嘅警告信號!

隨時瞓得著原來係危險警號 認知能力或好低

日本精神科及睡眠專門醫生三島和夫指出,生活中有唔少人經常自豪自己「容易入睡」、「喺邊度都瞓得著」,但其實可能係嚟自身體發出嘅「危險信號」!事實上,睡眠時間充足嘅人,由熄燈到瞓著需時大約15分鐘。環境變昏暗後,需充分調整體內環境至入睡狀態,眼瞓嘅感覺先會慢慢浮現。明明好早走上睡床,但直到入睡為止,卻花費咗好多時間,相反地因捱夜導致睡眠不足,就會好快瞓得著。根據每日嘅疲累狀態,或前一日嘅睡眠時間不同等因素,入睡時間每日唔同係普通不過嘅事。

睡眠健康
喺邊度都瞓得著可能係嚟自身體發出嘅「危險信號(示意圖,非當事人)(圖片來源:《經常請食飯的漂亮姐姐》截圖)

「我每日一上睡床就會秒速入睡!」呢種人好有可能正受慢性睡眠不足症困擾!特別係工作提早結束嘅晚上,比平常時間更早上床就寢,呢啲時候都依然好快瞓得著嘅話,更需小心注意。睡眠係擁有容易推遲延後(捱夜),但難以提早進行(早瞓)嘅特徵。所以,若然喺比平常時間早就寢,都仍然好快瞓得著嘅話,就係睡眠不足嘅徵兆!

睡眠健康
插圖來源:irasutoya

晏晝都好瞓得嘅係「紅色信號」

為咗測試有冇睡眠障礙,會有一項檢查係客觀測試午間嘅睡意強度(反覆睡眠潛時檢查)。檢查會於日間時分,分4-5次進行,每次約2小時,患者將被安排到昏暗安靜嘅房間中橫躺,透過腦波檢查入睡所需時間。

睡眠時間充足嘅人,直至入睡嘅平均所需時間為十多分鐘。檢查嘅4-5次當中,有1-2次係檢查結束20分鐘後完全無法入眠。此結果係因為晚間有充分確保好睡眠時間。另一方面,通宵一日後於翌日再進行同樣檢查,平均入睡時間縮短至2、3分鐘。其中更有1-2次只需花十幾秒就能瞓著。一般而言,平均入睡所需時間未夠8分鐘嘅情況下,則將被判定為「異常的睡意」。

睡眠健康
瞓晏覺瞓得好亦是警號(圖片來源:Unsplash@erik mclean)

或會導致認知機能低下

醫生指,最近多咗唔少明明冇通宵,但受強烈睡意困擾嘅患者。進行反覆睡眠潛時檢查後,很多都屬於只需數分鐘便能入睡嘅強烈睡意。雖然多數會懷疑患上睡眠窒息症,又或明明夜晚瞓得好足,日間時分卻受強烈睡意困擾嘅嗜睡症,但實質確診嘅病人並沒有很多。經過多重檢查後,大多都發現強烈睡意嘅原因係「睡眠不足」!

睡眠健康
大多都發現強烈睡意嘅原因係「睡眠不足」!(圖片來源:《愛回家之開心速遞》)

年輕世代大多都認為「瞓6個幾鐘夠晒啦」,但因為身體必需嘅睡眠時間比你想像之中長,日積月累嘅睡眠不足,便成為日間強烈睡意嘅原因。

呢類人嘅共同特徵,就係「只要一上睡床就即刻瞓得著」、「無論喺邊都瞓得到」。呢項「能力」並非睡眠健康嘅表徵,相反地,係身體嘅警告指示。狀況持續嘅話,有機會導致認知能力低下(冇記性、表現力低)、壓力度增加,身心均會有莫大負擔。

「會議開始便立即覺得眼瞓」、「上車一坐落位就瞓得著」、「食完飯瞓喺梳化不驚不覺就瞓著咗」⋯⋯如果你都係咁嘅話,就要好好改正自己嘅睡眠習慣喇!

睡眠健康
「食完飯瞓喺梳化不驚不覺就瞓著咗」就要好好改正自己嘅睡眠習慣喇!(圖片來源:《愛回家之開心速遞》)

圖片來源:TVB《愛回家之開心速遞》、Unsplash@erik mclean、irasutoya、《經常請食飯的漂亮姐姐》