旅遊騙案層出不窮,旅人真係防不勝防,一唔小心受騙有損失,就大大影響旅行心情。唔好以為只係去到落後國家先有機會中招,其實去到歐美等大國一樣有機會出事!早前 Just The Flight網站就為旅人挑選出 40種常見騙案招式,讓大家知己知彼。Viviy都曾經試過在意大利街頭差點被小偷光顧,又試過在巴黎聖心堂的樓梯上成功避開手繩黨,所以出門前先做好功課,自己小心最重要,依家先睇其中 10種常見旅遊街頭騙案 !

撰文:旅行‧最重要的小事、圖片來源:新傳媒資料室、旅行‧最重要的小事

10種常見旅遊街頭騙案

01|「友誼手帶」

如果去過歐洲的朋友,應該對此方法唔會陌生,騙徒多數會喺著名景點等遊客經過,唔理三七廿一就將手帶綁喺你手,然後問你攞錢,又或者乘機偷你嘢!想避免中招,最好方法係見到有人攞住手帶行過來時有咁遠行咁遠,千祈唔好被佢掂到你隻手。

常見於:巴黎、羅馬、巴塞隆拿、開羅

02|情侶小心!玫瑰送贈黨

同女朋友同遊時要小心,騙徒會將玫瑰送到你女友手上然後問你收錢,到時你自然唔畀唔得啦!

常見於:巴黎、羅馬、巴塞隆拿

03|扮晒路不拾遺!跌戒指黨!

騙徒喺地上執起隻戒指然後問係咪你跌的,當你否認後佢就會 check 一 check 隻戒指,再同你講原來係金戒指,開個價叫你買。

常見於:巴黎

04|拋B棄子

行行下抱BB女人會將手中BB(其實係公仔)拋向你,當你手忙腳亂接住個BB時,佢嘅同黨已經將你袋內值錢嘢洗劫一空了。

常見於: 羅馬

05|「街頭偽人」表演、攝鏡變勒索

歐洲街頭經常有好多人表演,睇還睇,記得睇實自己個袋,你身邊的「觀眾」好有可能係偷走你嘢的同黨!不過歐洲街頭有好多正當的賣藝者,如果錯過佢哋嘅表演會好可惜,都係嗰句,睇還睇,小心自己財物。

常見於: 巴黎、倫敦

06 | 先生,你跌咗銀包!

行喺條街時,有人問你地下跌嘅銀包係咪屬於你,唔少人都會下意識地摸下自己放銀包個位,咁其實變相話畀個賊知你放銀包嘅位置,同黨就可以吊住你尾趁機做嘢!(

常見於: 羅馬、烏克蘭

07 | 小姐,你條裙污糟咗!

呢個都算係經典又冇品的方法,將污糟嘢(e.g.茄汁)整落遊客件衫,然後扮好人去幫你清理,當然順手「清理」埋你嘅銀包電話啦!Viviy就有朋友喺西班牙中過招,成個銀包被人偷走!

常見於: 里約熱內盧、布宜諾斯艾利斯

08 | 專呃好心人,擦鞋仔扮殷勤

擦鞋仔會在遊客面前特登跌咗個鞋刷,如果你幫佢執番,佢就會提出幫你擦鞋作為答謝。若然你接受,佢擦完鞋後就會問你收錢,殺你一個措手不及!

常見於:伊斯坦堡

09 | 賣迷迭香的女人

呢一招通常由上咗年紀的女性來負責,佢哋會假裝送你一小束迷迭香,跟住就會捉住你隻手幫你睇掌算命。當然,算完命就會問你收錢,如果你唔畀,佢就會開始詛咒你,甚至用好惡毒嘅字眼來「問候」你!

常見於:馬德里、新德里

10 | 免費攝影師

有冇試過去旅行時請當地人幫你影相?去到歐洲時要格外小心,騙徒會喺呢個時候主動過來幫你揸機影相,影完就大條道理問你攞錢;更差的例子,就有可能攞住你部相機或電話逃之夭夭。

常見於:歐洲各地