【香港機場】對於一般旅客嚟講,正常唔delay的話,機場只係一個短暫停留嘅地方。但對於職員嚟講,好多時喺公司喺機場仲多過喺屋企,見到同事仲多過阿媽,好多機場有嘅地方都係我哋知、你哋未必知,又或者未必去到嘅,不如我哋一齊睇下啦!

撰文:地勤夫妻去旅行|圖片:地勤夫妻去旅行

1|Staff lounge 員工休息室

其實都唔知開心好定唔開心好,以前都唔會有員工lounge。話說好幾年前,有人投訴好多員工出咗公司以外嘅地方去瞓覺,仲話除晒鞋,令人側目咁話。坦白講,我以前都會出去瞓,鬼咩,一日返十幾個鐘,有時返屋企都唔夠時間,個機場又咁大,做完嘢中間有個break,真係見到櫈就會坐落去瞓得著!公司啲梳化都瞓滿晒人,搭飛機要stand by都話吖,連休息都要stand by梳化就真係慘!多咗呢啲休息室係好,但機場唔夠人,愈唔夠人就愈多OT,愈多OT就愈冇人想做,呢個惡性循還都係未解決。

2|機場幼兒園

呢個又係唔知開心好定唔開心好,應該係啲阿媽阿爸要返工湊唔到仔,所以開個幼兒園畀佢哋,定係想吸引埋有小朋友嘅人入嚟返工呢?都係好事嚟嘅!因為聽聞好受歡迎,遲啲仲會再開多個,證明真係有用嘅。希望再有多啲德政啦!

3|航空學院

可能係因為知道機場唔夠人做嘢,唔夠人到基本上係任何post都係唔夠人。所以近呢幾年就開咗航空學院,搞咗好多課程。喺邊呢?喺機場世貿大樓。機場世貿又喺邊呢?其實就係T2旁邊座大廈喇!有人話讀乜鬼嘢書吖,機場你肯入嚟做就得!咁我又覺得任何一個可以吸引到人入機場做嘅方法都係好事嚟嘅,因為都係嗰句,都唔夠人。

4|機場緊急應變中心

呢個好似好神秘嘅地方,集合咗好多機管局嘅職員、唔同嘅地勤代理公司嘅人、幾個大屏幕同閉路電視,機場每個角落都睇得一清二楚。當有颱風、緊急事故時,呢度就成為最最最忙嘅地方。

5|免費淋浴設施

坦白講,呢度好似係上年先開嘅,喺抵港層嘅22號閘。之前有人鬧,話擺喺抵港層有乜用,都返到香港,梗係返屋企先沖!咁我又覺得佢原意係畀轉機客用嘅。不過件事又有啲尷尬,因為如果轉機客唔知有呢個設施又走咗上去離港層,但上咗去等轉機又落唔得返去抵港層,咪又用唔到?有人話畀staff用,都係嘅,返足一日工,(我哋俗稱踩whole)有地方沖個涼都係好事嚟嘅。

6|香港特區政府貴賓室

有啲對機場好奇嘅朋友會問,機場係咪有特別通道?我諗呢個都算係了!好多政府高官、外國元首、政要等嘅重量級人馬都唔會出現喺登機櫃枱,咁佢哋點check-in呢?佢哋都會喺呢個貴賓室休息,然後有專人為佢哋check-in服務,然後再經佢哋專用嘅通道上飛機。咁明星呢?Sorry,都係要同普通人一樣去櫃枱check-in,明星冇專用通道㗎!