飛機真的好污糟。早前,Travelmath.com 網站做了個研究,原來比洗手間更 dirty 嘅,竟然係眼前塊餐桌板tray table! 飛機最污糟 原來係以下 4  個地方!

01|清潔姐姐「抽樣式」抹枱

研究在飛機艙多個高危位置收集細菌樣本,發現 tray table 比起洗手間嘅沖水按鈕含菌量高 8 倍,因為每程機嘅清潔工作甚少會翻開餐桌板洗抹。雖然調查的對象不多,未夠全面性,不過照我平時觀察,張枱又真係幾污糟!

講起我都唔好意思,試過派餐時,叫個客打開張枱,一打開,瀨嘢啦,上手個印度客倒瀉咗嘅「哦靚次」juice 仲有跡不特止,仲要個客掂到,搞到隻手黐立立!我就梗係馬上「沙冧「,攞出消毒濕紙巾俾個客!好彩個客最後冇投訴,唔係嗰程機個老總咁「好人」,我真係手尾長!!大家以後搭飛機,如果空姐派熱毛巾或者濕紙巾(如果有),用來抹枱好過抹手。

02 | 暗藏終極污糟,係你個「袋」!

不過我覺得最污糟嘅,應該係放 inflight magazine 的 seat pocket,也就是每個位置前面的置物袋。見過有乘客將杯 Starbucks咖啡塞入去倒瀉晒,換襪又塞入去,用完的紙巾又塞入去!咁都未夠終極!我上次做一班澳洲機,見到強國大媽將用過嘅紙尿片,求其揸埋一堆,放晒喺 seat pocket 度,大安旨意有人幫佢清手尾;另外有見過強國客,用透明膠袋裝住小朋友嘅尿尿,去完、打個結,又係放喺個袋度⋯⋯

喺度真心奉勸大家--千祈唔好將零食和口罩、唇膏、眼罩等貼身私人物品放入椅背小口袋!

03|洗手間反而更乾淨?

調查入面,洗手間嘅廁所沖水按鈕同門鎖都榜上有名,不過比起前面講嘅,洗手間算是很乾淨!特別在日本port,清潔人員都抹得好俾心機。而我哋,都會間唔中清潔一下各個廁所嘅。都係嗰句,飛機真係好污糟,千祈唔好赤腳走!

04 | 地氈係隱性殺手

編按:睇過其他網上的意見,發現原來地氈都好污糟!架機有幾長,地氈就有幾長,表面上睇落好乾淨,但入面隱藏嘅細菌同塵蟎係超級多。試諗諗,機艙地氈被數百千萬人踐踏過, 得閒就成為客人鞋底清潔布,轉個頭又吸下廁所、廚房嘅水跡,唔知平時清潔/吸塵要等架機飛幾多轉後呢?所以都係嗰句:千祈唔好赤腳走!