兩年幾前,一款號稱可以變大縮細、自動伸縮嘅「攞你命3000式」智能喼神喺 Kickstarter 上橫空出世;就連 TripAdvisor 都畀 like 推介。等足兩年半,「喼神」 FUGU LUGGAGE 終於發貨!可惜超長嘅等待並冇帶來超卓嘅成品,「喼神」真身竟然只係一嚿猶如失敗發明嘅搵笨膠喼,想知「喼神」有幾災難?即睇以下呢篇(相信係)全港獨家嘅血淚開箱文。

文:痴心情長劍

能屈能伸 新一代旅行喼嘅典範

首先,等我同大家回一回帶,睇下「喼神」係點宣傳嘅。話說當年有班高人喺 Kickstarter 網站上宣布,話佢哋已經搵到關於旅行喼嘅最終解決方案—發明咗一個可以縮做 hand carry 登機喼,又可以自動變做 30 吋 大容量行李箱,兼有埋手機叉電功能嘅智能喼神,既啱商務公幹又適合冚家去旅行(片喺呢度)。

產品當年獲 TripAdvisor 等旅遊 gadget 網站大讚,甚至形容為新一代旅行喼嘅典範;「喼神」亦曾於本港引起熱話,新假期當時也把它封為「最強多功能行李箱」,但誰又會估到原來係個世紀大騙局呢?

雷聲大雨點小 智能喼神發貨日子拖足兩年

咁嘅神級科技產品, 2015 年 Kickstarter 集資價盛惠 US$299,吸引到超過 1,600人 科水,集資額超過 US$50萬。講到呢度,你係咪覺得有啲似科網仙股騙局先?未算!樓有樓花,估唔到喼都有喼花,「喼神」出貨期由最初預計喺 2015 年尾派貨,竟然拖到 2017 年!如果 Apple 同你講, iPhone X 要等到 2019 年先有貨,唔知大家會點諗呢?

內置低智能鼓風機 淨重達 7 kg

背景交代完,係時候講番隻喼,「智能喼神」望落四四正正,到底好不好用?當我收到「喼神」嘅時候,我真係呆咗一呆,喺呢個連飛機都追求輕量化嘅年代,「喼神」竟然淨.重.7.公.斤!吓!足足 15 磅?!

原來「喼神」內置咗個超 low-tech 鼓風機,用嚟吹脹個喼,從而達到變大嘅功能。只可惜個鼓風機又大又重又異相,更足足佔咗三分一喼身位置⋯到底係個喼被佢吹脹,定係用家被佢吹脹,我就睇唔透喇!

伸縮功能差過預期

講完重量,又睇下個變身功能吖。喺上面條宣傳片,大家見到「喼神」個變身係幾咁瀟灑, 但真相又係點呢?Well⋯有片有真相,個鼓風機插咗電之後,居然發出嘈過劣等吸塵機嘅噪音,然後只見「喼神」兩側好似軟皮蛇咁緩緩脹起,過程毫無動感,絕不俐落。

結果聲大大冇貨賣、半硬不軟嘅吹氣過程足足歷時 3 分半鐘,「喼神」先叫做抬起頭來。唉!一諗到如果有日要喺候機室吹脹「喼神」,大庭廣眾,我真係驚被人請食海狗丸啊!

用料質量低 儲物空間小

跟住再講講外觀同物料。首先,「喼神」唔係用上等纖維物料,只係ABS膠。轆呢?更加只係得兩個,仲要唔係萬向輪。間隔方面亦都欠奉,USB叉電位呢?原來要另加 US$49 先有得用。喂阿哥,咁我自己買個尿袋唔好?總而言之,成個「喼神」無論外觀、質感、實用性,點睇都係似淘寶山寨災難貨色,點對得起 US$299 嘅集資價?

記者實測 儲物空間有多大?

記者嘗試把以下物品塞進行李箱內,看看實際儲物空間到底有多大。

薄毛氈 × 1 |薄冷外套 × 1
連帽外套 × 1|T-shirt × 3
半截裙 × 1|頸巾 × 1
雨傘 × 1|手信零食

國際買家中伏經驗分享

正如逛淘寶必睇買家秀,想了解「喼神」更多,當然就要睇睇環球買家嘅開箱點評同留言啦!

經過兩年半等待換嚟呢個「喼神」,我只可以話呢種講咗當做咗,吹水又掠水嘅空頭支票精神,絕對直迫我哋嘅創科局。又或者咁講,我真係唔敢再笑麥當勞啲漢堡包同廣告唔一樣喇!

https://www.youtube.com/watch?v=zk9EeqRHhrY