搭長途機閒閒哋都十個八個鐘，瞓又瞓得唔舒服，真係好鬼悶㗎嘛！惟有旨意 機上娛樂 系統，可以有新戲畀我睇下打發時間啦！點知，聽航空界的老朋友講，原來航空公司為咗慳燃油成本，考慮拆除飛機上的部分娛樂設備，包括拆除每個座椅靠背上的電視屏幕，預料每架飛機因而可以減磅1 至2 噸！為咗合理化自己嘅諗法，啲航空高層仲話，依家啲客唔係瞓覺，就係玩自己部「手機／Pad Pad」，若然拆晒所有屏幕，架機就減磅兩噸，慳番油錢之餘，仲可以環保！
阿珍聽落就梗係覺得唔筍啦！連娛樂設施都要自備，正價航空當廉航辦，難道慳油又可以唔派飛機餐？不過部分廉航如新加坡的 Scoot 同AirAsia 都行緊出租平板電腦當娛樂系統，減輕成本之餘仲賺多筆。
航空減磅 怪招層出不窮
其實早在2005 年，本地某大航空公司就曾成立一個「飛機減輕專責小組」，旗下員工要為慳油出謀劃策，徵集而得的招數包括：
- 不再給機隊外殼髹上航空公司標誌，轉而改為磨光的金屬表面選用；
- 更輕巧的餐車及乘客座位；
- 考慮用較輕紙張刊印機上雜誌；
- 拆除座位上的娛樂系統，改用限量派發平板電腦；
- 以及提高航班準時率，以讓機長毋須為了趕時間而加快飛行速度。
咁多個提議入面，多數都係為慳而慳，阿珍就覺得最後一項「提高航班準時率」最啱聽、最積極嘞！