有邊個想去旅行搭飛機先嚟唔舒服喎~ 不過世事嘅嘢好難講,如果 touch wood 真係喺 搭飛機時唔舒服 ,都唔使驚嘅~ 熟讀以下解救心得啦~ 希望幫到你哋喔!

01 | 暈機浪--空姐幫到你!

根據經驗,不穩定氣流係十分常見,十次有九次都會遇上,分別只在於氣流的嚴重程度。記得有一次香港打風,而我就咁啱要飛,嗰程飛機簡直似搭緊過山車, 仲要勁多人嘔! 所謂預防勝於治療,如果你知道自己平時搭船搭車都會暈浪的話,不妨先吃暈浪丸。另外check-in 時嘗試要求坐飛機中部(近引擎位置)嘅座位,會比飛尾位置穩定好多的。

你亦可以:

a / 向空姐索取一杯溫檸檬水,切記唔好一下子飲晒,一小口咁飲,索下啲檸檬味,有助紓緩暈浪症狀;

b/ 避免望住座位前嘅電視,嘗試望遠距離少少嘅嘢,唔好focus一點,如果唔係會愈來愈唔舒服㗎~

02 | 耳塞、耳鳴、耳痛 --暖水的神奇妙用

如果只係輕微嘅耳塞,你可以嘗試吞口水,或者?粒萬樂珠(飛機有少量供應),嘗試令耳仔通番。留意!有鼻塞症狀人士係特別容易出現耳痛、耳鳴情況,你可以先吃藥,或吸一下熱水的蒸氣,有助減少鼻塞,便可減低耳痛程度。

03 | 腳部浮腫--注意登機服裝可以紓緩

機艙環境狹窄,長期坐喺細小嘅座椅上面,好容易阻礙身體血液循環,於是身體水分就會積聚喺下半身,出現水腫情況。建議乘坐飛機時唔好穿緊身褲或 leggings,應該穿鬆身褲、多注重下半身保暖亦有助血液循環。另外多走動亦有助促進血液循環,減少腳腫問題。

04 | 皮膚敏感--機艙環境易出事!

因為機艙環境太乾燥,皮膚極度缺水的話,防禦力就會降低,一旦有細菌就好容易被入侵,結果將會係皮膚痕癢、敏感。建議做好保濕,同時避免面部皮膚接觸到飛機供應的毛氈、枕頭、座椅(因為…… 其實好污糟㗎)。

詳細機艙護膚貼士可參考我另一篇文章:空姐教路 | 女生上機前必看:機艙護膚 5 大錦囊

05 | 腸胃不適--熱敷幫到你!

有冇諗過水土不服嘅情況有可能喺乘坐飛機時出現?原因有好多,可能係飛機餐太油膩、飛機食水唔夠乾淨,甚至係你自己之前食錯嘢~ 建議本身腸胃比較敏感人士可帶備腸胃藥,萬一唔舒服都有自己食開嘅藥打救。遇上腸胃不適時,除咗可以飲暖水之外,熱敷亦可有助紓緩肚痛,所以帶定暖水袋或暖貼上飛機亦都係聰明之舉~

大家請謹記,如果遇上胃痛、屙嘔不適情況,請你盡快通知機艙服務員,佢哋會有相應措施、藥物提供。

空姐談飛機冷知識:機艙最污糟 ,竟然不是洗手間?