成日都會有朋友走嚟問我,如何搭 長途機 不失霸氣而又舒服。我通常第一句都會講笑答佢,坐頭等囉。如果你唔似早排YouTube熱爆嗰位仁兄好彩地被人upgrade坐頭等,以下小貼士就啱晒你喇!

長途機5大法寶

01 | 頸枕冇得輸

第一樣一定一定要帶嘅,絕對係頸枕!咁多個鐘,唔用嘅話,真係會瞓到頸痛!大家千祈唔好帶我呢款,我完全因為個頸枕外觀而買,其實唔太好枕,太扁喇,冇咩承托力,用咗好似冇用咁樣。另外試過MUJI有款,平時喺飛機上都見到幾多人用,太軟身,亦唔建議買!屋企人買咗一款,高身、硬度高,好用好多!因為咁樣先可以托到你條頸。

02 | 私家scarf最衛生

你可能會問,機上都有氈,點解仲要自己帶呢?我知,帶多樣嘢麻煩又佔行李空間。不過自己做呢行,明知機上面啲氈用過嚟抹尿尿屎屎嘔吐物,實在用唔落手。另一原因係, 長途機 坐喺度十幾個鐘唔郁動,體溫會因低運動量而下降,就算平時唔怕凍,都係帶定外套或頸巾以備不時之需,總好過想要嘅時候冇得用,大家又唔係唔知機上一氈難求!

03 | 長短途都啱用 花王蒸氣眼罩

大家有睇開我嘅,喺之前一篇關於旅遊必帶寶物有提及過!我係不論長途短途都會帶埋呢個花王眼罩,價錢唔貴,就算香港買都係幾十蚊一盒,一盒又可以同友人一齊share用!仲要用完一次就可以唔要(想當眼罩當然可以再用),一啲都唔會佔空間!除咗可以幫助入眠,對抗時差外,仲可以當普通眼罩用!個人經驗係,用咗之後,真係容易啲入眠!

04 | 機上熱水好污糟 必備暖水壺

呢個特別推介畀女仔同埋老人家。機上面有冷熱水冇錯,不過,如果你有睇過ViuTV《晚吹》「空姐爆料」嗰集都知,機上熱水係極度污糟(凍水我會用支裝水畀客)!如果你係一個無熱不歡嘅人,建議自己帶熱水,有時凍嗰陣飲幾啖,又或者瞓醒嗰陣暖下胃,真係好過去問人攞水~我要重申,機上熱水真係好污糟!同行有老人家嘅強力建議要帶!(編按:好多讀者都留言問點樣自己帶熱水,其實好多機場入咗禁區後都會有飲水機,凍水熱水都有,自備水壺就OK啦!)

05 | 保濕用品、防曬唔怕多

嚟到作為貪靚鬼最著重嘅一個環節,美容!機上溫度咁乾,要比平時更注重保濕!長途機我係一定會敷面膜!之後要瞓喇,仲要厚搽一層sleeping mask先瞓,我嘅心水係雪花秀,佢簡直係我嘅捱夜神器!以前我會帶保濕噴霧,最近發現就算加咗油嘅,鎖水能力都唔好,倒不如直接用鎖水能力好嘅面霜!重點!千祈唔好忘記防曬!機上紫外線係好強DER~

溫馨提示:早 check-in 有著數!

最後,再醒多少少畀大家知,坐長途機,可以嘅話早啲check-in,事關今次我轉機嘅關係,於是變相最早check-in,地勤姐姐畀咗第一排我坐啊!十幾個鐘可以伸直對腳同屈住,真係好大分別呀!!