機師爆港人搭飛機7種難頂行為：內地客仲易處理
每逢聽到「大陸」或是「內地人」，部份人總會自然地套上「既有印象」，聽到普通話避之則吉，不過有機師指「香港人都唔好得去邊」。早前曾有一名港藉機師提到自己的一個親身體驗，指「以乘客身分搭飛機，被一團香港團包圍，終見識到港客行為，不比內地客好」，更列出7種極品行為。
01｜旅行大晒 喧嘩嘈嘈閉
旅行團一行大概二十人已經不斷喧嘩大叫，又要調位又要傾計，更不停阻塞乘客流動的主要幹道，令其他乘客充分感受到他們即將出發去旅行的興奮心情。
02｜恥笑空姐 自以為英文好好
日藉空姐做英文廣播，難免有些少口音……有幾個乘客除了模仿廣播中不純正的英文外，更說他們聽不懂兼大大聲地取笑做廣播的空姐，其實他們懂不懂得「尊重」兩個字怎樣寫？
03｜起飛時取行李
即將起飛之際，有位乘客突然站起來打開頭上的行李架去拿東西。空姐們立即叫他坐下來，佢還說：「唔記得攞出嚟，一定要攞！」我就絕不相信他會因為當時不拿東西而突然暴斃。
04｜扮晒大爺 全程零尊重
當空姐推著餐車問乘客們想要吃喝甚麼時，他們只顧睇戲，又不除下耳機，但又要空姐不停重複又重複。
05｜衝燈去廁所
即將到達目的地，飛機開始下降，安全帶燈號亦亮起了。此時此刻，乘客當然覺得最重要的事情並非將椅背調直或將個人摺枱收好，而是要去洗手間，而且還去了很久還不出來！
06｜諸多意見 機師都批評埋
飛機在降落前因為陣風而搖擺不定，但降落時落地平穩，個人認為絕對沒有問題。不過當然有乘客不甚滿意，互相投訴說「而家機師啲質素真係越來越差」
07｜趕住落機
飛機降落後，大家都急不及待地解開安全帶，站起來拿行李。空姐做了數次廣播後，他們才肯乖乖坐下。最後飛機稍稍減速但尚未停定，安全帶燈號亦尚未熄滅，他們又發出最後的吼聲，起來起來起來。
網民共鳴：香港人真係好難搞，又貪小便宜
文章貼出後，得到網民熱烈的回應，認為「香港人真係好難搞，好失禮」。有網民認為香港人不懂得自我反省，表示：「香港人其中一大特質你都展現咗，就係有咩事一定係賴咗人先，唔係自我反省。明明好想同國內有分開，想分開來講，唔想混埋佢哋度，但係往往呢d港人負面嘢，總係有一班港人好齊心要assume咗佢哋一定係內地人而唔係港人先。 呢啲行為就show到港人『有事就一定喺人度負責，有好嘢先好搵我』（而自己唔會反省）嘅特質！」
香港人天性貪小便宜
除了責任感一到外地即消失無蹤外，另一個重點是不懂「便宜莫貪」的道理。有網民指 「香港人最貪小便宜，人要佢又要，叫嘢飲飲一啖就call light 叫空服員收返」、「 賤廢港女老奉幫佢放行李，但個行李通常過 6Kg」、「港女扮唔識聽中文，又要講港式英語扮高級，但文法錯哂」、「我十幾年前跟團去北歐，同團的不是校長級就是醫護人員，但他們自私的行為真的不比強國人好，也不是學歷關係，是人的品德問題。」
港人旅行禮儀差 外國人一眼就認出：遲到及自我中心一定有份！
網民認為港人的形象及旅行禮儀差，表示：「香港人係外國嘅風評一直都係惡劣，亞洲人嚟講真係同內地人平起平坐咁差，唔好下下覺得自己高於大陸人啦…香港人貪小便宜、講嘢大聲、遲到、自我中心、語言不知所謂，呢幾點基本上你問任何外國人都答到你」、「其實好多真香港客都好難頂，即使唔係新移民，嗰種俾少少錢就扮大爺嘅嘴臉真係世界級」、「除咗呢樣，仲好多打完尖仲鬧返你轉頭」、「外國好多網都成日報導香港旅客的惡行」、「又講得幾中肯！當搭飛機變得人人afford得起，仲要每年點都有幾次咁多時，乘客嘅質素自然下降」。
周圍都有難頂嘅人 台灣都有「奧客」
「一樣米養百樣人，不論人種，質素也參差，昨晚在馬場要收費嘅坐席，就分別見到白人和黑人的無禮貌和自以為高人一等，所以不要分人種的批評」、「而家台灣人同其他亞洲地區嘅人都開始多左呢類嘅態度，總之而家做空服業有點吃力。」
服務業人士指內行一早已知「香港人咩料」
「做過服務性行業，都知港客難頂過大陸客㗎啦！」、「喺香港做過任何服務性行業都會知道香港人可以有難搞」、「做過香港服務業都知香港人咩料啦」。
鬧埋港女：
- 「港女英文差，中文又差，最叻係以為自己醒。」
香港本地教育得唔好 應著重道德教育
「其實唔多唔少都關TVB事，以前電視劇入面都總係會有條友講『我要投訴你！叫你負責人出嚟！』，tvb拍呢啲八婆行為特別出色入肉，睇到大家都不知不覺習慣性地模仿咗呢啲行為。」「咁又唔可以咩都話政府……品德係家教……父母責任！」、「香港教育不著重道德方面，一生讀書只為考試，反映香港教育制度同大陸一樣咁垃圾，禮、義、廉香港學校有教過？冇，所以要怪就怪香港政府，唔好標籤晒所有香港人」。
另類意見：「你知唔知好多內地人扮香港人？」
「你要知道，這些所謂香港人可能都是剛申請到港，他們未經香港好文化感染，反而，醜陋的行為卻做到十足十，把自己的方便建築於別人的痛苦上。」、「現在實在太多假香港人了，單憑講廣東話有時真係好難分！」