「低工時,高時薪」嘅求職廣告喺日本街上屢見不鮮,而嗰啲求職廣告畀人嘅感覺係充滿欺詐同黃色成分。今次先唔講呢啲,想同大家介紹下喺日本社會確實存在嘅搵快錢途徑,但通常又易請、工作又簡單待遇又豐厚嘅工作一定有佢嘅難處,不過最少畀我哋體會到辛苦過後確實係可以得到世間財,終有一日如果不幸地霎時手緊嘅話,以下嘅工作可能會救到你一命(好似係)。

01 | 特殊清掃員/遺品整理

通常待遇:日薪7,000~10,000 yen(約HK$480~HK$684),另加額外津貼

年輕人自殺、老人孤獨死係屬於日本社會嘅常見現象,而呢啲社會問題發生嘅同時亦造就咗1個特別行業--特殊清掃業。

當1個獨居人士死去,警察同消防員處理好遺體後,屋內除咗剩低先人嘅遺物之外,地板同物件會留低遺體腐爛後所產生嘅血液同體液,而且滋生大量蛆蟲同惡臭。喺呢個時候,包租婆/逝者家人就需要委託特殊清掃業者將室內清潔。

特殊清掃員主要嘅工作頭先都有提及,就係將1間充滿血液、蛆蟲同惡臭嘅房間清潔得乾乾淨淨,同埋處理先人嘅遺物,應廢棄就分類廢棄,貴重品就交畀逝者家人。相信返呢份工一定慘過洗廁所同執垃圾,但其實絕對唔輕鬆同人工未算豐厚,少啲使命感都未必能勝任。

稱職人士:喜歡打掃、擅長捉蟲、能抵受惡臭、喪屍電影愛好者

 

02 | 輻射災區工作:原発作業員

通常待遇:月薪400,000~600,000 yen(約HK$27,384~HK$41,076),福利超完備(福島縣)

311都發生咗好幾年,輻射問題至今仍未完全解決。「原発作業員」呢個職業因災害發生後需要大量請人同人工上漲。要入行並唔需要咩專業技能,而工作都十分簡單,着上防護衣物後,喺災區清除輻射污染物同收集泥土同水源樣本作發驗之用。相比起其他輕作業工種嚟講,人工相當唔錯,福利都十分完善,又保險又免費宿舍等。至於壞處就唔多講啦…..

稱職人士:烈士、忍者龜fans

原発作業求職指南

 

03 | 趕人出屋:追い出し屋

通常待遇:每戶30,000 yen(約HK$2,053)以上,遇上特別危險情況可另議

由於我日文唔太好,所以我都譯唔出「追い出し屋」嘅中文名稱,咁只好盡量形容畀大家知啦!

「追い出し屋」就係驅逐嗰啲租屋唔交租嘅租霸嘅職業。喺日本對付租霸呢啲咁嘅爛佬係要靠「追い出し屋」先有機會趕得走佢哋,因為日本警察好少對民事有所干預,無論對於租霸又好討債又好都消極處理,所以呢種行業係有存在嘅需要。

「追い出し屋」大致上用呢3種方法驅趕一般租霸:

  • 喺租霸屋企門口貼「欠交租款」之類嘅大字報,作為對租霸嘅初期警告。
  • 當租霸依然唔搬出嘅話,就要趁租霸外出時用後備門匙入屋,入屋後將租霸嘅家財全數賣出,作為租金。
  • 如果再唔搬出嘅話,亦會趁租霸唔喺度嗰時換走原本嘅門鎖,租霸從此趕出。

以上3種方法其實都係犯緊法,同埋入人哋間屋係有一定嘅潛在危險性,對自身前途同安全有好大影響。

至於入行方法基本上唔會喺一般求職渠道搵到,通常要加入暴力團又或者租務保證公司私下招聘。

稱職人士:聲大夾惡、有刀疤人士

04 | 收錢做白老鼠--治験

通常待遇:21日20夜大約400,000 yen(約HK$27,384),包食宿

講起搵外快,「治験」可算係咁多搵快錢之中嘅代表。「治験」即係指試藥員,當1種藥物研發後,最後係需要人體實驗後方可發售。

嚴格嚟講試藥員唔係1種職業,實際上係1種高回報嘅義工,而具體嘅工作就係一段期間內入住醫院,定時定候食藥同指定嘅飲食、定期檢查同進行驗血驗尿等等,除咗離開特定範圍外一切活動自由,想睇電視睇書打機做運動都可以。總括嚟講工作性質就係被研究,如不幸喺實驗期間出現副作用嘅話,一樣有適當治療。

相比起之前介紹嘅工種嚟講,「治験」可算係輕鬆得多,但參加者對於唔同嘅測試會對體格上有唔同嘅要求,所以未必咁容易被聘用。

稱職人士:嗜藥者、醫院愛好者

 

後記:以上純粹係向大家介紹一下日本搵快錢嘅冷知識,並唔希望大家為咗豐厚嘅回報以身犯險,每種職業喺社會上都有一定嘅定位同建樹,亦希望大家以開放態度去理解!


facebook page: 日本住人港喱啲

延伸閱讀:赴日小知識 | 日本文化 10樣事項你要留意