A君的有錢仔朋友成日話:「 退稅 退得雞碎咁多,仲要晨早入機場排隊,為咩呢?」其實計計數,去旅行例牌大買特買,仲要幫親朋好友「走水貨」,淨計買幾個名牌手袋, 退稅 金額隨時夠你買多個!所以旅行掃貨, 退稅 真係基本常識,不過各國退稅手續不一,魔鬼細節又容易中招,退少幾蚊事小,無端端被搵笨就真心嬲!即刻同你拆解多國 退稅 小知識!

01|  退稅物品係咪一定要跟身?

大部分國家都有明文規定退稅物品要隨身攜帶方便檢查,不過歐洲國家在寄艙前都會有檢查Counter,退稅後就可以放入喼!而日本、韓國等地有時會抽樣檢查,如果無隨身攜帶將會被課稅,不過一般退稅品如衫褲鞋襪、手袋、電器、100ml 以上的酒精等,都不在規範內,反而被特殊辨識包裝的化妝品、零食等,還是乖乖跟身免得被罰吧。

相關文章:check in 前必知 | 6 類必須 寄艙手信

02| 歐遊多國,退稅又要點樣做?

歐遊多國(歐盟國家)的話,其實唔使每次出境都退一次稅,反而可在離歐回港前的最後一個國家一次過取回所有退稅款項,所以平日掃貨後只要叫店員幫手填表,之後帶齊護照、收據、表格等在離歐前的機場辦理手續就得,勁方便!倫敦2年後脫歐將會有新的退稅機制,到時記得要留意!

03| 以為省掉手續費?信用卡退稅未必更划算!

未必!在歐洲以現金退稅手續費貴過退入信用卡,令不少人都會揀後者,不過原來有魔鬼細節,信用卡退稅除了要留意匯率變動,更要注意DCC(動態貨幣轉換),即係同步匯率,如果選擇退稅款項以港幣退回信用卡,就會以DCC 機制的匯率(比正常匯率差)即時計算,Global Blue 更會收3% – 5% 貨幣轉匯費用,完全係蝕上加蝕,所以退稅金額大,一定要計清楚,或者先退回當地貨幣吧。

04| 申請退稅遲遲未收到錢,點算好?

不少網民表示有中伏經驗,例如巴黎海關於退稅單經常漏蓋海關印,寄表時對方又話收唔到等等,這個時候便要去法國駐香港領事館搵人幫幫手,記得要帶齊護照、居港證明、登機證(如有)、退稅單存票、收據及退稅的物品(全部……),辦理手續後就將文件寄到當地退稅公司(以巴黎為例便是常見的Global Blue 或Premier Tax Free),之後等待處理便可取回款項,不過要謹記在離境6個月內完成,把握時間!

相關文章:DFS 退稅有問題!護照資料被利用

05| 要趕飛機,回港後先退稅又得唔得?

唔係個個地方都得!例如在巴黎買咗個LV,其實可以回港先退稅,不過在當地步驟一定要做到足,而且要提交的證明多多(如法國領事館的證明、居港證明、登機證等),仲要未必退到,事關當局唔一定會接受你未能在當地退稅的理由!既然咁麻煩,都係早啲去機場排隊吧!