【外遊 禁忌】話說前幾日有個內地OL去澳洲,因為冇行李、冇訂酒店,當地移民局懷疑佢係黑工,然後被人遣返。呢啲事基本上喺香港日日都有,被香港拒絕入境嘅又有,被外國拒絕繼而遣返嘅都有。其實地勤人員喺check-in嘅時候,都會對旅客有一定程度嘅審視,遇到奇怪嘅旅客,我哋都會通報上級,因為其實好多已發展國家都會有派人嚟香港同航空公司職員有training,教我哋點樣睇假證件,點樣分辨一個旅客嘅旅遊目的,遇到懷疑係我哋俗稱「跳飛機」,或「跳水隊」(即係有可能偷渡)嘅旅客時,應該點做,不如用地勤嘅角度睇下呢單新聞啦!

撰文:地勤夫妻去旅行|圖片:新傳媒資料室

外遊 禁忌

1|單身

移民局通常都會對單身人士有更高警覺性,始終做壞事都不會一家大細,或者夫妻檔,單身男的都會以為你是黑工,或是運毒、走私之類。單身女的,就以為你是去做黑工、賣身之類的。小編自己獨遊日本都試過被問話,翻箱倒篋,底褲都睇埋,因為原來有好多人走私毒品、黃金⋯⋯

2|遲訂機票、現金訂票

通常去旅行都會好早計劃,起飛前幾日先買飛,畀人感覺沒準備。仲有,現金買機票畀人覺得你唔想被人追蹤到出票來源,因為用信用卡的話,知道嘅資料多啲,兼且有得信用卡,個人點都有啲經濟能力。

3|冇帶足夠衣物、行李

冇行李令人誤會你走佬,或者太少行李去到一個唔合邏輯嘅程度,都會惹人懷疑,例如去冬天地方應該要有大褸,衣物較多,行李較重,但check-in時得一件行李幾公斤,望下你張機票去玩一個月,件事就好奇怪,我哋就會上報。

4|冇行程單、酒店訂單

即使係一時興起,都最好知道自己會去邊、打算住邊度,好少好少人去旅行會連落腳嘅地方都冇,即使係有朋友親戚接待,都唔好連地址都冇,人哋當地移民局一問你,你咩都答唔出,真係好難怪人哋唔知你去佢國家做乜。同埋去美國,check-in時就已經要你提供當地地址,亦都會有保安人員同你嚟個簡短嘅interview先。準備好喇!

5|英文能力

好現實,識得用英文溝通,證明你起碼受過教育,同埋識英文,你先解釋到畀人聽你嚟做乜。呢樣嘢冇得呃,試過親眼見過應該係移民局嘅職員去逗一個懷疑偷渡嘅客,佢手持一份英文報紙,但可惜上下倒轉⋯⋯個職員要求佢求其讀一隻字嚟聽下,都做唔到,然後佢立即被帶走⋯⋯

6|回程機票或離開當地機票

我都明backpackers一來想慳錢,二來亦預唔到幾時走,但人哋國家好關心你入咗去佢度,幾時會走,係咪返屋企唔緊要,離開佢國家就得。其實好多國家都講明,若果你冇回程或再往下一目的地嘅機票,係有可能會拒絕你入境,仲有,例如免簽逗留30日,但你張機票回程係30日後,都可能會有麻煩,地勤亦都會檢查呢樣嘢。

7|可理解的行程

例如香港去東京,咁多直飛,就算係轉機,去台北、韓國轉都令人覺得make sense啲,去曼谷轉、去吉隆坡轉,就會令人覺得行程好奇怪,因為好多所謂「跳飛機客」可能會喺中轉站換證件,甚至換人上飛機。

8|請如實申報旅遊目的

試過親眼見過一個旅客,可能英文唔好,或者問多兩問就驚,個移民局職員問,第一句就話自己係嚟business,問多兩句係咪開會,公司卡片又冇,邀請信又冇,再問多兩句,突然又話係tourist,真係唔惹人懷疑就奇。

其實老土講句,真金不怕洪爐火,若果你係真.遊客,點都唔會被人問到口啞啞。不過坦白講,backpackers 有好多特點都同偷渡客相似,我自己獨遊時都遇過同樣問題,被人問咗我成個鐘。但最重要係答得有紋有路,目標清晰。

地勤公司每日都收到好多我哋稱為 INAD = Inadmissible 拒絕入境旅客,好多原因都係 unclear travel purpose,即係不明確旅遊目的。老實講,香港人機會係較少嘅,但係都有,下次去自己留意一下喇!