港女朋友要求多多,既想要信譽十足的酒店品牌,又想要裝潢夠新,空間要夠大唔使同人逼。好在 Anantara Layan Phuket 都無令她失望,品牌進駐泰國多年,年底開設布吉的第三間分店,選址島上比較寧靜的西北部,依山而建對正 Layan Beach,距離芭東鬧市 30 分鐘車程。去年底更開放新建成的私人酒店式住宅公寓,位處山腰凌駕山腳的所有房,坐擁最靚景色。

The Residences by Anantara 大到可以捉伊人!


布吉明顯沒有土地問題,事關 5 間獨立 2 層高的 Residences 有3至7房的房型,最大一間面積超過 27,000 平方呎!我們今次入住面積最小的 3 房 Residences,都有18,000 平方呎,大到可以玩捉伊人!管家帶我們參觀果陣,由上層的泳池、飯廳、客廳和主睡房,行到下層的雙人睡房和私人 spa room,逐間房睇睇足20分鐘,住慣香港豆腐潤劏房的朋友們都忍唔住嘩嘩聲!

thailad_phuket_villa2
酒店沿沙灘依山而建,Resort 配套集中山腳位置。

5 房單位相較3房的,多一間健身室和視廳娛樂室,愈多人去愈著數!

管家服侍做大帝 港女要求實測

硬件配套夠強之餘,這裡亦都貴在私人管家服務上。平日做慣屋企阿四,同朋友出國豪一次,齊齊體驗大帝般服務!這個形容並不誇張,事關一踏入Villa,兩位管家已經帶我們到客廳歎冷氣和冰凍的椰青,不消一刻又神速把我們的行李準確送到各自的房間。問過兩位靚女管家,她們會在別墅底層的隨時 stand by,不會打擾住客生活,真正隨傳隨到!
測試一:巨型水泡吹到氣咳

升呢做大小姐,梗係要管家幫手充氣,唔係邊有水泡玩!

測試二:懶病大發逐啖餵

食殘廢餐係誇張例子,不過管家 Eve 話,如果客人要求唔太過份,她們都會盡做!

測試三:1分鐘光速現身

次次都唔使 1 分鍾現身,莫非管家要練埋短腿?

下一頁:多嘢玩到唔想走!

21米Infinity Pool 匿喺Villa都夠玩

同老友出遊,最忌分房唔勻,太逼又要爭廁所沖涼,隨時有拗撬。不過入住 Residences 就一定無呢個問題,所有房型都坐擁21米長私人 infinity pool,十幾人落晒水都唔嫌逼,開P一流!另外2間主客房和1間雙人客房都附設獨立浴室,主客房的最誇張,仲大過我香港個狗竇。超大的衣櫃、更衣空間、淋浴間、浴缸和2個大理石洗手鏡檯,真係爭都唔使爭!加埋所有住房統統對正海景,落地大玻璃加埋露台,人人一起身都可以睇到靚景。
飯廳內仲連埋開放式廚房,備有完善的煮食工具,一班人想玩吓煮飯仔都得。不過,屋內已經有私人廚師,唔想咁麻煩自己落手,只要事先柯打,廚師會在屋內即場炮製,無論中、西、泰菜,甚至連叉燒包都識整,令我們一行港女驚喜十足!

主客房有張 King size bed,仲要對正落地玻璃海景!

管家每日會把乾洗完的衣服泳衣掛在浴室的超大衣櫃之中,好貼心!

每幢 Residence 泳池池底都有玻璃洞,游游吓都可以跟下層做緊 Spa 的朋友say hi!

玩唔停手! Join埋Resort活動

窩在獨立屋,hea 足幾日做隱青,亦係時候搵搵事幹!入住 Residences 的住客,可以同樣享用 Resort 的配套。Check-in 時,職員已經遞上活動時間表,除了參加固定的團體活動,亦可以安排一對一專人教授。經過管家的安排報名,我們決定挑戰當地的國民運動──泰拳!無諗過 Resort 內竟有埋擂台囉!雖然肌肉型靚仔教練細心教足60分鐘,但我們一班港女無姿勢又無實際,都係擺返個甫士影相算啦!除此之外,住客可以參加cooking class、瑜伽,甚至可以出海浮潛、划艇,不過樣樣都要加錢!

住客可以選擇在 Gym room 或是三角形教堂中學瑜伽。

泰拳稱得上當地國民運動,同靚仔教練學一個鐘,需約 THB2,500/HK$537。

玩完私家泳池,可以落埋 Resort 的泳池,毗連沙灘可以曬太陽、玩沙灘 game。

記者試住點評:

優點:

  • 雖然周邊沒有商場,但鄰近Laguna Resort區,靜中帶旺。
  • 職員做事有效率,一叫肚餓,半個鐘就準備好成枱餸!
  • 在resort內遇到香港職員,聽到廣東話超親切。其他職員的英文不錯,溝通無難道。
  • 房間設施和用品超齊全,感覺同屋企無異,轉插、USB插都有,方便為電子用品充電;每房亦設有超大型廁所。
  • 活動選擇多,亦有私人沙灘。

缺點:

  • 的士無法直接到達山腰的獨立屋,每次都要管家用高爾夫球車接送,次次上山落山都幾麻煩。
  • 房間勁多燈掣難操控,落地窗簾的搖控開關按鈕失靈。
  • Spa 價錢偏貴,90分鐘傳統泰式按摩索價THB3,700/HK$792。

總評:一分錢一分貨,無論環境、服務都滿分,管家隨傳隨到,笑容又夠甜,見到都開心!加上獨立屋空間夠大,娛樂設施又夠多,多人都唔使爭,最適合一大班朋友 gathering!

Anantara Layan Phuket

【地址】Layan Beach Soi 4, Cherngtalay, Layan Beach, Phuket
【電話】 +66(0)76-317-200
價錢】3房THB141,791起,最多可入住9人,平均每人HK$3,407;
5房THB260,491起,最多可入住15人,平均每人HK$3,755;
【前往方法】距離布吉國際機場約30分鐘

【網址】phuket-layan.anantara.com
【備註】最少入住3晚;官網訂房可獲20%房價回贈