近年愈來愈多香港人愛上滑雪,如果你都有少少心郁郁想試下,但滿腦子疑問,睇下以下的解答幫唔幫到你:
(我N年前第一次去北海道就愛上咗北海道同滑雪,最初係玩Ski,之後轉玩Snowboard,唔係高手,但年年都會去日本滑雪一兩次。除咗滑雪,我平時咩運動都唔做,我有信心我以下的答案非常中肯!)

ski_snowboard_katt02

Q1:揀Ski定Snowboard好?

A:呢個係所有人問的第一個問題。
首先,毫無疑問,Snowboard係有型好多嘅,除非你係Ski高手!不過,最決定性你揀邊樣,係你的體力同埋你預幾多日喺滑雪場。自問腰力腳力體力都唔多夠的話,揀Ski吧,唔使諗!又,如果你只預一日(就算係一整日包括night ski),都唔使諗,揀Ski吧!

Ski係比較易上手:

你只要學識少少基本技巧,一個上午都可以坐上ski lift滑落山,下午應該已經可以自已玩。不過,易學難精!

Snowboard呢,就要花多d時間:

基本上,第一個上午,你只會不停跌、不停撐起身、再跌、再撐起身,lunch的時候,你就會發現腳軟(特別係大髀)之餘,拎筷子或刀叉都會手震!大部分女仔或體力弱少少的男仔,都好難會keep到下晝再滑,可能都要休息一下,到第二日先繼續玩。要真係開始享受到Snowboard的樂趣,我建議最少玩3日

雖然學Snowboard的過程係辛苦好多,不過呢,比起Ski,後者都有兩個「舒服位」:一,Snowboard boots冇Ski boots咁硬,行路(特別係上落樓梯)易好多!二,如果喺雪地跌低,玩Ski係比較難起返身,Snowboard就易好多,特別係好斜的地方,Ski上板(甩咗的話)就更難。

Q2:玩Ski定Snowboard危險d?

A:意外嘅嘢真係話唔埋,但一般來說,Ski可以發生的意外係多好多同大鑊好多,因為你兩隻腳可以分到好開,可以整傷的機會大d,再加上雙手都拎住ski pole,跌的時候會不自覺撐住,其實好易整親!反而玩Snowboard呢,就因為雙腳都被lock死咗喺塊板度,通常最多都係扭親!另外,如果愈滑愈快,你驚起上黎,要跌,一係向前仆一係向後坐低,最多都係膝頭或pat pat瘀咗,除非你跌落地用手撐住,整親手腕就最傷!

Q3:要搵教練嗎?

A:要,一定要,滑雪唔同踩單車,唔會跌跌下就識咗,有d基本技巧係真係要搵人教的,建議搵私人教練學1.5-2個鐘。教練好唔好,係嚴重影響你會唔會愛上滑雪呢個運動,但要遇到好的教練係唔易,不妨問下朋友有冇介紹,早d book定!ski_snowboard_katt03

Q4:去日本邊度滑最好?

A:真心,初學的話,特別係玩Snowboard,北海道係最好!Powder snow又輕又軟,跌極都唔痛,起碼你唔會因為痛而驚跌唔敢滑!東京近郊的話,2月份苗場同白馬的雪質都唔錯(天氣嘅野話唔埋)。

Q5:要唔要住喺Ski resort?

A:初學的話,最好住Ski Resort,因為真係會好攰,就算除低咗Ski/snowboard boots,雙腳都好似唔係己咁,你唔會想行太多路,想9秒9跳上張床度攤下!所以就算貴少少,都係住喺Ski resort好。(裝備方面,遲d再講。)

相關文章

【日本】冬季限定!嚴選2016年日本10大雪祭

【北海道】雪地冰地穿鞋5大要點+網友QnA

【北海道】超實用冬天穿搭教學篇