「真係羨慕死人~我都想好似你咁,可以試一次說走就走嘅旅行啊!」

當我請大假去旅行時,同事咁樣講。我……我只係去五日四夜嘅大阪啫……

旅行豐儉由人 「深度遊」定「食買玩」自己揀

「去囉~」我。
「講笑咩~邊似得你咁有錢去旅行啊。」同事。
「但係……我人工好似低過你。」
「我見你貼晒 facebook 啦!又刺身又神戶牛!」
「其實呢……」
「唔使講啦~我真係唔捨得咁大使,日本生活指數咁高!香港其實乜都有啦,我唔捨得飛去日本食囉~」

相片來源:leavemehere.wordpress.com
相片來源:leavemehere.wordpress.com

我必須承認,我係嗰種唔適合窮遊嘅人,我認為去旅行方式豐儉由人,無論係深度體驗國家文化,定係瞓到下晝先起身,全程購物、食同玩……完全係自己選擇,有人鍾意住靚酒店,我對瞓覺冇乜要求,只要地方衛生交通方便我就滿足。有人鍾意天未光就起身,爭取身處於外國嘅每一分一秒,我覺得去旅行都要休息,想瞓到夠先起身食嘢慢慢行。

無論係邊種玩法,無話邊個識玩啲,去旅行最緊要自己開心。如果要遷就其他人,我情願自己一個去旅行。

圖片來源:mainichi.jp
圖片來源:mainichi.jp

表面「話走就走」 實則「處心積慮」

至於公司同事一直羨慕嘅刺身、神戶牛、話走就走……喂阿哥,你估真係咁爽,唔使付出㗎咩?喺旁人眼中嘅「話走就走」,實際上其實係「處心積慮」。唔單止要睇準紅日連假,仲要睇實幾時有廉航機票特價,最後如果撞正有同team同事請咗假,所有嘢都會前功盡廢,講粗口都冇用。

一次旅行,要集齊晒天時、地利、人和。所以如非必要,或者屋企有事,平時都唔會亂用大假。就算病咗都堅持住要返工!因為……

(細細聲)病假係有時用嚟大假去完旅行處於holiday mood ,所以請多日假留喺屋企休息!

另一方面,去旅行我的確係會比起平時大使咗,我唔知有冇人同我一樣,去到日本,覺得佢每樣嘢都包裝得好靚,就算明知屋企冇用,都好想擁有一件擺喺屋企……

為旅行慳飯錢 留待旅行嘆美食質素更好

至於可以去旅行食得咁豪氣,只係好多人都睇唔到,平時喺香港慳咗好多餐飯,盡量食平價餐廳,就係為咗去旅行時豪氣一次。雖然香港喺飲食方面的確有好多唔同選擇,但對比番,食番同類食物會貴當地食成倍,質素又唔夠當地咁好。

以牛肉為例,香港周街都話自己係和牛,好多燒肉店打正旗號賣和牛,收嘅亦都係和牛價,但實際上賣嘅只係高級少少嘅本地牛。
香港嘅打工仔,薪水追唔到通脹,工時長假期少,連去個旅行都被人閒言閒語……

其實,用咩方式去旅行,同點樣先可以去旅行,兩樣嘢都可以由自己控制。

專頁:http://www.facebook.com/BlueGodZi
Ig:BlueGodZi