雖然近年好流行窮遊,可以了解國家文化之餘,又可以慳錢,一舉兩得。
不過,當大家都討厭強國旅客嘅「有錢便是爺」態度時,都要注意一下,有啲錢係慳得!但假如為咗慳少少錢而破壞環境生態,其實一樣咁討厭

image

跟導賞團睇企鵝搵笨?

話說,之前喺澳洲工作假期時,已經好渴望睇又蠢又細粒嘅野生企鵝,當環澳到達塔斯曼尼亞,煩惱緊點樣報名參加導賞團,於是向其他室友打聽,點知好多室友都講:

室友A:「唔使畀錢睇呀!直接揸車去到,泊遠少少偷偷哋行落沙灘,黃昏時就有好多小企鵝上岸!」
室友B:「導賞團要成HK$200啊!仲要離遠睇,自己行落去,又唔使錢,我仲行埋去摸過隻小企鵝添!」
室友C:「蠢人先會畀錢,啲人畀錢係聽個導遊講解,你又唔識聽英文,畀錢嚟做乜?」

0009C6D55D807815458FCBl

我覺得奇怪,於是上網搜尋下,發現導賞團嘅存在,小企鵝上岸嘅位置都圍晒圍欄,通通都係有原因,而唔係特登為咗收大家錢。

一切只為保育!收費貴得有理

原來,小企鵝(或稱小藍企鵝,另一種可以近距離睇嘅係神仙企鵝)係一種好細膽嘅生物,佢哋平時住喺啲石縫間,每朝一大清早就會出外搵食,一直到天黑先會返上岸。但因為佢哋太細膽,所以好怕閃光燈,若果你用閃光燈影佢哋,佢哋就會以為有敵人入侵咗佢哋地盤,覺得呢個地方有危險,於是……

佢哋就會即刻跳番落水,以後都唔會返嚟,或者可以搵到一個新嘅巢穴,但係小企鵝係群體生活嘅動物,離群嘅小企鵝大多凶多吉少

所以,參加導賞團除咗可以計準晒每日小企鵝嘅返閨回巢時間,工作人員仲會用低光嘅射燈,確保唔會傷害到小企鵝。由於小企鵝視力差,幾乎唔會見到特製射燈嘅光線,咁就唔會嚇親佢哋,見到佢哋最真實嘅一面(幸運嘅話,會見到佢哋近距離喺你腳邊經過)。

墨尔本企鹅归巢10-600x600

謹記「齋睇唔准掂」

另外,小企鵝千祈千祈唔可以掂
唔係因為佢哋會咬人,或者會感染病菌。
而係因為,小企鵝係用氣味辨識同伴,若果身上有人類氣味,嗰隻小企鵝就會被同伴離棄,而單獨嘅小企鵝係九死一生!所以大家就算見到佢哋行埋嚟,都千祈唔好掂

最後,我同女朋友都報咗導賞團,雖然環境太黑影唔到一啲好清嘅相,但見到佢哋成班小企鵝,一隻跟住一隻咁行返屋企,有時仲會突然仆喺地,或無啦啦停喺原地發呆……

DSC_1484

當你見到佢哋最自然生活嘅一面,就唔會想傷害到佢哋。
當你搵到一個慳錢嘅方法,都要查下到底自己嗰種方法有冇破壞到其他嘢。有啲錢係唔慳得!


專頁:http://www.facebook.com/BlueGodZi
Ig:BlueGodZi