【日本姆明谷樂園】等咗大半年,日本姆明谷主題樂園 MOOMINVALLEY PARK終於喺聽日(3月16日)正式開幕!樂園內分為四大區域,唔止有機動遊戲玩,亦有好多姆明故事內嘅建築、人物登場,處處都係打卡位!影完又玩完,記得唔好漏咗行精品店呢個環節呀!

撰文:C|圖片:MOOMINVALLEY PARK、駐日芬蘭大使館公式Twitter

日本姆明谷樂園 四大遊樂專區

1|POUKAMA
姆明故事世界的入口

姆明嘅故事由書本誕生,於是樂園嘅入口便由4本分別印有故事中不同主要角色模樣嘅大書設計而成,只要穿過「書本」,就能向姆明嘅世界前進。入口處設有班戟店,以及紀念品店。

2|MUUMILAAKSO
姆明谷中心區

呢個區域係成個姆明谷嘅核心區,設有現場表演舞台嘅「Emma劇場」、參考故事設計圖完美還原嘅「Muumitalo 姆明之家」、體驗故事中冒險情節嘅機動遊戲「Merenhuiske」等等。

3|KOKEMUS
互動體驗區

KOKEMUS喺芬蘭語中帶有「體驗」嘅意思,呢個區域為3層高設計嘅展覽設施,包括互動體驗專區、常設展覽或特設展覽,甚至有同故事內容相關嘅手作體驗workshop。除咗睇同玩之外,亦有由北歐直送的姆明精品雜貨店及café。

4|YKSINÄISET VUORET
冒險與思索之山

畀小朋友「放電」嘅遊戲區域!既有「Athletic Tree House」畀小朋友跑下、郁動下,又有體驗飛行嘅「Zip-line Adventure」,喺來回約400m嘅宮澤湖面上「飛」過。玩之外,當然唔少得去「燈塔」打卡影靚相啦!

睇完落成實物圖片,即使唔係姆明死忠fans都會好想去感受一下北歐故事世界!不過已經喺pre-open入園嘅日本網友指,如果想去gift shop買紀念品嘅話,建議上午一入園就預先去買,因為到咗下午1點左右,就會開始排長龍,排隊畀錢要排一個鐘!同埋剛開幕,人潮預計會好多,plan行程時,記得留番足夠時間喇!

日本姆明谷樂園 MOOMINVALLEY PARK

開幕日期:2019年3月16日
地址:埼玉縣飯能市宮澤327-6 Metsä Village
交通:可從池袋站(約50分鐘)、東京站(約70分鐘)、八王子站(約35分鐘)、川越站(約25分鐘)、橫濱站(約90分鐘)乘電車前往飯能站
營業時間:10:00am-8:00pm(根據活動舉行日等或有所調整)
休息日:參考官網
費用(所有費用均為3歲以下免費):
1)姆明谷入園票:成人(中學或以上)1,500円/約HK$105、小童(4歲以上及小學生)1,000円/約HK$70
2)Merenhuiske機動遊戲:1,000円/約HK$70

3)Pikku Myyn Leikkipaikka機動遊戲:700円/約HK$49
4)Taikurin Seikkailupaikka(Zip-line體驗):1,500円/約HK$105
5)姆明之家導賞:1,000円/約HK$70
購票方法:僅限網上預約
網址:metsa-hanno.com/moominvalleypark/

下一頁:2019 日本黃金十連休 | 遊日旅人避開人潮須知! | 賞花+交通+兌錢注意事項一覽(持續更新)

下一頁:【遊日注意】10大日本旅遊禁忌|不做失禮旅人

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡