01 | 直接飲水喉水
日本嘅水喉水可直接飲用，尤其大阪嘅水係最乾淨，不過我都係唔夠膽飲。
02 | 單車要用真名登記
全國嘅單車都有義務申請「防犯登錄」，即係每部單車都要實名制登記，如果有遺失嘅話，警察執到你架車都可以畀番你。
03 | 踩單車戴耳機係犯法
單車坐兩個人、兩架單車平行行駛、擔遮踩單車、戴住headphone踩單車同踩住單車講電話均屬違法。
04 | 犯法要上堂
喺大阪如果咁唔好彩重複被警察捉到犯咗以上法例，需要喺指定日子上三個鐘「自転車運転者講習」，上咗堂之後就唔使交罰款(但係上堂係要錢)！
05 | 警察唔幫手，只因語言不通
喺日本未必好多地方都有警署，但係一定好多派出所。大家唔好以為警察一定識英文，如果你同佢溝通唔到而佢又覺得好難幫到你嘅話，佢會趕你走，叫你搵個識日文嘅人嚟幫你。
06 | 日本解款員係冇槍
日本係一個對槍械管制嚴格嘅國家，平時我哋見解款員會攞住支Shotgun，但係日本解款員只有一件避彈衣同一支警棍。
07 | 日本搵工網
平時我哋搵工用 Jobsdb、Careertimes 等搵工；而日本多數用リクナビ、マイナビ等搵工網。某日我發現到警視廳喺マイナビ開post請警察，人工仲幾奀下…..
08 | 冇定幾時出糧
香港勞工法需要7日內出糧，但係日本係冇法例規定需要幾時出糧。但幾時截數同出糧會喺工作待遇中表明，我相信25號截數，月尾出糧係最正常嘅時間。而我曾經做過一份20號截數，下個月10號出糧嘅工…..
09 | 不為假紙，睇病為取藥方
日本嘅醫療係醫藥分家，即係診所內唔會有配藥員，睇完醫生之後就會開張藥方俾你，然後你就要拎呢張方去「処方せん薬局」配藥。而呢間藥房賣嘅藥係 「第1類医薬品」，就咁喺街係買唔到嘅。
10 | 保險與收入為正比
較早前提及過日本人需要供國民保險，唔供嘅話，如果有病固然要承擔高昂嘅醫藥費，但係供咗唔代表一勞永逸，因為供咗嘅話，每當睇病都要負擔三成醫藥費，而最特別之處係保險費會相應你嘅收入等因素而調整。
11 | 冇水芽菜、唔酸烏冬
初到日本嘅時候喺超級市場裏面見到兩樣嘢顛覆咗我嘅常識—-冇水嘅芽菜、唔酸嘅10 yen包裝烏冬。
12 | 日本人真係食「便所飯」
平時喺高登睇到啲毒撚成日話自己喺廁所食飯，其實喺日本一直都存在「便所飯」，便利店嘅廁所係開餐熱點之一。
後記： 以上論述嘅資料來源純粹係本人嘅遭遇，難免有啲偏頗同主觀。日本嘅生活環境同香港實在有唔少差異。
講到尾各個地方都有好有唔好，個人而言，如果融入到當地文化嘅話，日本都算係個好住好玩嘅地方，
未必好似坊間所講得咁難頂。生活呢家嘢，即使平時返工做到死，放假嘅時候可以做到自己鍾意嘅事，感覺會好得多同活得快樂。
總括嚟講，人哋嘅意見只可參考，最緊要係自己鍾意！