夫妻遊日 返港時竟被地勤告知「搵唔到訂票記錄」
關先生日前與太太一同到大阪旅行，出發前在一個機票網站購買HK Express大阪與日本的來回機票，同時亦在HK Express網站額外付費選用自訂座位服務。去程一切順利，但回程到達機場櫃台辦理登機手續時，卻被機場地勤告知乘客名單上「無佢個名」。地勤當時解釋到：「有可能你信用卡過唔到數，又可能你第三方公司無幫你買機票。」與地勤交涉約半小時，登機櫃台亦即將關閉，地勤堅持關先生需要另外購買一張約$16,000的機票才可上機。
找出訂票記錄竟被反問「點解唔俾登機？」 無奈另買機票返港
但就在關生「打定輸數」以$16,000的價格購買另一張機票返港時，另一名男職員突然出現，並應關先生要求查看紀錄。查看紀錄後，該男職員回覆到：「我查到你紀錄喎！」後來竟笑一笑反問關先生「咁點解唔俾你哋登機呀？」不過儘管已找到購買機票紀錄，亦已經為時已晚，飛機早就已經起飛，最後關先生亦只可以自費約$10,000， 再買另一間航空公司的機票返港。
HK Express質疑投訴真確性 竟要求出示現場相片影片作證據
返港後，關先生隨即以WhatsApp及電郵向HK Express作出書面投訴，換來的卻是HK Express的質疑，懷疑他投訴的真確性，令關先生感到極為不滿！HK Express在頭1、2次仍有回應事主，但後來卻表示經查問相關地勤人員後，與他的說法有所出入，故詢問關生當時有沒有拍攝並留下相片及影片等作證明。HK Express要求證據的舉動令關生措手不及之餘，亦感到十分諷刺，而HK Express至今仍未就事件向關先生提出一個確切的回覆。
《東張西望》出手亦被冷待
而收到關先生報料的 《東張西望》製作組就事件向HK Express作書面查詢，但在節目播出前仍未收到任何回覆。至於關先生就因為是次的經歷，對HK Express完全失去信心：
我都唔會再用呢間航空公司，好彩今次唔係單獨去旅行，突然返唔到香港，真係驚，亦都想其他人知道，原來一日未手執登機證，買咗機票都唔代表你有機位。
網民反應兩極 貪平抵死 vs 好多第三方agent都好鬼
事件經報導後，網民反應兩極。有部分人懷疑事主是因為太遲到達機場，令地勤人員無法在系統中順利查詢他的訂票紀錄。不少人指出買機票最好還是直接向航空公司購買，千萬不要貪平，「經二三線agent買機票都係麻煩」、「窮鬼貪平，無錢就唔好去旅遊啦」，以免「出事之後唔知搵邊個負責」。
不過亦有網民指出部分第三方agent都「好鬼」：「俾咗錢都可能唔會有機票or係假機票……以前做航空公司見過唔少呢啲case……啲客經agent俾咗錢，不過agent根本都冇幫個客做booking or ticket，甚至係整張假野俾佢就當幫佢出咗機票。」同時亦有人指出出現如此離譜的事一定要拍攝記錄以保障個人權益，「依家有咩事梗係攞部手機出嚟拍片㗎喇，保障返你自己呀，下次醒啲啦」。
