飛機啱啱停泊好,一個個乘客都急不及待打開行李櫃攞齊行李準備走佬。呢個時候,有一個南亞裔男人走過嚟機尾嘅廚房同我哋講:「我遺失行李呀!」呢班機上雖然有成百幾二百個乘客,但係我對佢都有啲印象,我記得佢坐喺67J。

搭飛機遺失行李?該乘客早有前科……

因為我派餐派到佢嘅時候,佢同我講話佢有訂特別餐(穆斯林餐)。正常我哋派餐嘅做法會係派晒所有特別餐,先開始出動餐車派正常餐,如果當我架餐車去到一個乘客度,但係佢宣稱自己有訂特別餐嘅話,通常有兩個可能性。

  1. 佢其實冇訂,或者訂單因為不明原因失敗咗。
  2. 佢冇通知我哋就自己坐咗去第二個位,所以我哋跟座位派嗰時搵唔到佢。

乘客堅稱自己冇調位

於是乎,我當時就同佢再口頭確認一次:「呢個係咪你嘅原本座位?你冇調過位?」然後佢用斬釘截鐵嘅口吻同埋非常篤定嘅眼神否決咗我嘅懷疑,於是乎,我就問准我嘅艙務長:「67J嘅乘客話佢有訂穆斯林餐,同埋佢話佢冇調過位喎!」
阿姐回覆:「我個名單得一個訂咗穆斯林餐,係63J嘅乘客,不過我到依家都搵唔到佢去咗邊,我諗都係佢自己調咗位唔想認啫!唔緊要啦!照畀個特別餐佢。」如是者,呢個特別餐嘅問題就告一段落。

唔通行李識玩「伏匿匿」……

「我啲行李唔見晒呀!唔知係咪被人偷晒。」

既然呢個乘客講到咁大件事,我當然要跟佢去睇睇。我跟住佢一邊擠過企喺條走道上面等緊落機嘅人同行李,慢慢由機尾擠番上去67行。南亞裔男人指住67行上面個行李櫃,話佢啲行李原本放喺嗰度,而家竟然「ALL GONE NOW」!!!佢語帶驚惶,但係我心水清過蒸餾水,無視佢嘅大驚從早到晚失色,孤身向前行多幾行,打開63行,仍然緊閉住嘅行李櫃。

然後奇跡發生喇!佢啲行李竟然自己偷偷哋行前咗幾行嘅行李櫃,喺入面玩「伏匿匿」喎!真係好百厭呀!梗係唔會啦!真相係呢位本應坐喺63J嘅乘客去完廁所之後,就一直坐錯咗喺67J度五個幾鐘,一直都唔知自己坐錯位。

真係好單純好不造作呀!科科 (谷阿莫tone)!

下一頁:遇上史上最奇葩的乘客 原來改Wi-Fi名千祈唔好用……