撰文：CY｜採訪：CY、TY｜圖片來源：GOtrip編輯部
8度海逸酒店全新自助晚餐限時8折！愛爾蘭直送即開生蠔+全新燒烤區/甜品區
8度海逸酒店於9月開始推出「8度之秋」自助晚餐，一貫CP值爆燈的作風，價錢繼續好抵食，提供菜式再次大升級。
今次「8度之秋」自助晚餐主打每日兩款法國、美國或愛爾蘭即開生蠔，比之前更加厚肉，全部食落都好鮮甜，編輯即刻主攻生蠔，絕對有望食回本！
另外有肉厚味鮮的鱈場蟹腳任大家食！雖則不少酒店自助餐都有供應鱈場蟹腳，不過編輯最近留意到不少酒店餐廳都缺貨，在8度海逸酒店自助餐能夠見到鱈場蟹腳的蹤影，實在好令人興奮！
8度海逸酒店自助餐除了有一系列海鮮冷盤，編輯自己個人比較偏好多款中菜菜式。備受不少食客喜愛的冬菇燜鵝掌依然繼續有供應，冬菇相當入味，鵝掌燜得相當軟腍，而且相當厚肉，值得一試！
8度海逸酒店於自助餐內新增燒烤區，提供牛舌、牛肉串、燒蝦等等惹味烤肉及烤海鮮，對比主流燒烤店味道感覺偏淡，食多少少都不會覺得口乾，幾適合在自助餐盡情食！
今期「8度之秋」自助晚餐再重點呈獻滋補蟲草花燉老雞湯，碗碗都相當足料，趁開始入秋、天氣轉涼，飲一碗就至適合。
今次餐廳在甜品區方便有大變動，將暫時停止供應維持多年的梳乎厘，換換新口味，供應6款口味即製班戟。
嗜甜的朋友必食Oreo口味，想減輕罪惡感有士多啤梨、芒果等口味，甚至有榴槤迷必食榴槤蓉，雖然編輯好討厭榴槤，不過亦不得不讚賞實在夠多選擇，滿足不同口味的需要！
除了全新即製班戟，大家亦仍然可以食得到招牌芒果拿破崙、麵包布甸、Mövenpick及Häagen-Dazs雪糕等等逾20款甜品。
8度海逸酒店「8度之秋」自助晚餐將會延續之前優惠，凡於酒店eShop預訂星期一至五自助晚餐，即可享8折優惠，$484.2；預訂星期六、日或公眾假期自助晚餐亦可享85折優惠，$511.1。
想用至抵價食自助餐就要留意，每日首100名經酒店eShop預訂之客人更可額外享有9折優惠，低至$441.2！
8度海逸酒店「8度之秋」自助晚餐
- 供應日期：2021年9月1日至12月12日