港媽自爆入迪士尼樂園賴低4歲女買午餐
香港迪士尼樂園一向是親子遊的理想勝地，不少父母都計劃帶小朋友入園玩返餐。不過家長們帶小朋友入園絕對並不輕鬆。有港媽在Facebook群組「我真係好鍾意迪士尼資訊分享群」內發文，分享自己帶4歲女兒入樂園的經歷，引起不少網民關注。
餐廳爆場放低4歲女兒霸位
港媽分享指入園當日好多人，期間小朋友覺得肚子餓，就開始埋怨「肚餓肯定要搵嘢食，我已經揀咗間最少人嘅慧星（彗星），但都係爆棚。」期間有樂園員工提醒因為餐廳好爆場，要記得先搵位，港媽就決定搵好位後放低4歲女，放低電話供女兒消遣，隨後獨自一人前往櫃檯排隊買午餐，粗略估計約離開近45分鐘。
長篇表達內心愧疚 勸樂園推出改善方案
港媽表示自己當時緊張到「個心砰砰咁跳」，又稱
「當我見到我囡時，嗰一刻我畢生難忘，佢冇玩電話，而係大大粒眼淚望住我！我唔敢想像當時佢係咩感受，佢當時內心肯定好驚好驚，點解媽咪咁耐都未返嚟……」
港媽長篇表達內心愧疚，並「虛心建議」迪士尼樂園應該作出改善：「例如用app落單，或者有人送下餐呢？幫助下啲有需要嘅人」。
單拖家長感無助
有網民留言同意港媽建議，認為迪士尼樂園應該學習海洋公園，設置外賣餐車方面入園遊客買飯，港媽回覆表示同意之餘，又稱「似我依種單拖嘅家長都好多，人多嘅時候，真係好無助」又指自己「當日冇咁幸運，遇到啲熱心嘅市民，個個都自己顧自己」疑似暗示其他入園遊客自私自利，不願意伸出援手幫手湊女。
樂園迷反怪港媽推卸責任
亦有網民認為錯在港媽，認為港媽未有盡媽媽責任，將女兒放置在陌生人群中，「你哋食少餐唔會死，小朋友有咩意外就一世，唔好以為入咗迪士尼就肯定冇壞人/冇意外先得㗎」，並指就算認為樂園設施及安排不周，都不應該讓小朋友離開視線範圍。
網民齊建議迪士尼可設餐車&app落單
在爭論的同時，當中也有網民建議香港迪士尼應效仿海洋公園設立餐車，除了可以分流外，亦讓像事主一樣、一個人帶小朋友的成人可以一邊湊小朋友，一邊亦可以排隊買食物。另外，因為香港迪士尼也有專屬的App，建議可在App內設落單系統，方便入園人士。
