進擊的客人打邊爐打尖唔排隊！霸氣經理下令店內員工擊退
Facebook專頁「西客之道 Hispitality Secret」曾刊登了一宗酒樓「打尖」打邊爐事件，話說一枱客人未有在登記「等位」，一行人就直接入座，入座後，他們問侍應拿點菜紙，侍應質疑他們為何沒有入座時由店方分發的點菜紙，並要求他們出示「等位」的號碼票，無品客隨即發難「叫經理」，並揚言「我哋係唔走㗎喇！我要投訴你，投訴到你總公司，投訴到你哋全部無得撈！」
當網民都以為經理會屈服於無賴行為時，誰料他霸氣地回敬：「全部樓面嘅人同我聽住，無我吩咐，無人可以幫呢枱客落單， 斟茶都唔可以。唔識守規矩嘅人無資格係度食飯。」徹底打敗這枱無品客！
打邊爐不排隊事件的始末
幾個月前某日，小女子係某間酒樓打邊爐。因為打邊爐受歡迎，所以經常爆滿要攞飛排隊等叫。嗰日我打緊邊爐時，隔離枱有班客人自行入座坐低，然後開始叫侍應點菜。
西：我哋要個麻辣湯底+任飲+海鮮任食，點嘢食張單比張我哋睇下先，一陣再落。
侍：先生你入座時，會有一set畀晒你，而且你入座號碼飛喺邊？
西：我張飛一早比你地收咗喇，你地收咗又唔比單我仲要多嘢問？
侍：我地唔會收你飛，而且一定會畀單你。你等等先我問下門口。
（幾分鐘後）侍：先生門口無人帶過你入黎喎，你張飛咩number？睇下有冇聽錯咗？
（我覺得侍應都比面你自己落台）西：畀咩姐？畀咩畀？入咗黎坐低就係架喇！你問咁多做乜？叫你經理黎。
經理問完門口接待，帶位。confirm咗呢枱客位自己入黎坐後，再次好客氣咁請佢哋離坐。西：我哋係唔走架喇，我要投訴你，投訴到你總公司，投訴到你地全部無得撈。
然後經理黎料喇，好大聲咁講經：全部樓面嘅人同我聽住，無我吩咐，無人可以幫呢枱客落單， 斟茶都唔可以。唔識守規矩既人無資格係度食飯。
嗰枱客就呆咗一呆，然後呆坐係度幾個字就走。至於嗰位經理同樓面，我前幾日食飯都仲見到佢地喺度做。
（原文轉自「西客之道 Hispitality Secret」）
經理護員工保尊嚴 網民激讚
電視廣告一句「今時今日咁嘅服務態度唔夠㗎！」多年來害得幾多服務業從業員經常含怨受屈﹐今次這位酒樓經理霸氣地頂撞無品客，簡直就是勇者無懼的表現，保護員工之餘，又挽回尊嚴，一眾網民都大讚經理：「遇強而不屈，好嘢」、「呢啲管理先叫有吉士」。網民又批評食客態度差，指：「想享受有質素嘅服務都要睇下自己有冇品，嘅冇品又唔守規矩，仲要態度囂張，就無資格」、「西客成日以為自己大晒，但時代唔同，宜家香港人遇到不公義嘅事會企硬」。有網民建議經理要「加辣」指：「應該再補多句，淨坐超過十分鐘，雙計，轉頭出埋張單比你吖」