移民英國｜月入4萬家庭欲賣樓移民 妻憂生活艱難堅決反對
最近有媽媽級網民於網上討論區「親子王國」中發文表示，她與丈夫兩人現年已過40歲，育有兩名分別5歲和1歲子女。她指夫婦皆任職文員，月入合共約4萬，但兩人沒有特別技能。而夫婦二人在10多年前購入上車盤，待供完樓才生兒育女，亦有一架便宜的私家車代步：「我哋唔貪心亦無咩上進心，自覺生活算係安穩。」
她指夫婦倆並不喜歡香港的填鴨式教育，比起成績他們更注重子女是否開心，同時亦擔心日後沒有能力送子女出國讀書，因此丈夫打算直接移民英國，讓後代可接受更好的教育。然而家中有位70多歲老人身體欠佳，令她十分不捨。
移民英國｜懶散老公「得個講字」 萬個藉口不求上進
她坦言十分擔心移民英國後「搵唔到食」，同時也要照顧兩個小朋友。雖然提出移英的丈夫「拍晒心口」稱可以獨自出外工作，但她深知老公的性格「得個講字」，指「佢絕對唔會積極搵工，就算好彩搵到都會有十萬個理由話辛苦唔做再搵過」。
她指可以為養育子女不怕辛苦：「為咗2個細嘅洗廁所咪洗廁所，可惜，我都好肯定另外嗰個唔係」。如果情況反轉，事主出外工作的話，老公在家也只會是不作為：「佢嘅湊仔方式係電話、電視同遊戲機放題。咁得閒想佢喺屋企幫手做吓家務？絕對係陣間先、下次先、再遲啲先，拖到我頂唔順做埋！」
移民英國｜兩公婆意見對立陷冷戰局面 網上求救徵求意見
事主稱賣樓後保守估計有500萬元資金，但兩人並無積蓄，同時英文水平一般，擔心移民英國後難覓工作。另外她也指出丈夫懶散、愛充大頭鬼，對英國的樓宇買賣和稅收了解甚少：「每次提移民，佢個Plan係買樓，跟住一開二要嚟收租，我只係問佢知唔知英國買樓同放租稅收幾多？佢就會話我計到咁盡，咁邊度都唔使去啦，唔再聽我講落去。」
面對老公的質疑，她也嘗試放手讓老公計劃移民英國事宜，但就反被對方責罵無心準備：「我冇plan點去得到又係我錯，直頭俾盤數佢睇就係我太現實喇都係錯囉」而老公亦確實有參與過資料搜集：「唯一提供嘅資料係英超各大球會嘅入會資格同季票費用。」因為移民英國一事意見分歧，兩人現時已陷入冷戰，子女的教育已成老公近日冷嘲熱諷的題材。她覺得老公過於任性，亦「唔信自己廢」，令她對移民英國一事十分兩難，因此想詢問網民意見。
移民英國｜網民：天真過天真嬌！
帖文引起大批網民熱議， 不少人指出問題的本質並不是移民，而是兩人互相不信任，是婚姻關係出現問題。同時亦指出移英成功與否都不會解決兩人之間的矛盾，勸她不要過於天真：「佢咁廢，你咁勁，當初做咩嫁俾佢，仲要生埋仔」、「你已經話咗俾自己聽，將來係乜都你頂曬⋯而且似頂唔住，咁點解仲問人？」
另外亦有網民大鬧老公的不作為：「家務都唔識主動做，你呢個係喪偶式婚姻嚟㗎喎，呢啲男人結婚前靠老母，結婚後靠老婆」、「有老婆有小朋友都咁無責任感嘅，走去移民只係等死」。
