移民英國住邊好?有冇諗過喺邊度落腳?研究定居地往往是移民外地的重要一環,今次GOtrip編輯部找到移民英國,回流香港,現再回流英國的「港媽 • 講英」分享下自己的意見。

撰文:港媽 • 講英|編輯:SY|圖片來源:visitbritain.com

移民英國住邊好?

好多網友PM我,問英國咁大,點揀喺邊度落腳?有親戚就話可能會住近啲,如果冇嘅話,唔通聽過曼聯就揀住曼城?以下係小女,一名曾住英國十幾年,回流香港十幾年,再帶大帶細咁回流多次英國嘅師奶仔愚見。

首先,嚟得英國就唔好將香港嗰套搬過嚟。就算住喺central London嘅central,都唔好諗住好似香港咁樓下就有大商場駁通地鐵,黑雨都唔怕濕,半夜醒咗都唔怕餓。英國同香港係兩個唔同嘅地方,唔同嘅文化、唔同嘅天氣、食物、生活及娛樂環境。

圖片來源:visitbritain.com
移民英國住邊好?(圖片來源:visitbritain.com)

咁好啦,英國天大地大,由最南嘅Cornwall揸車到最北嘅蘇格蘭邊境都要大概8粒鐘。咁對一啲英國冇朋友冇親戚、冇留過學冇旅過行,只係可能略略聽過曼聯喺曼城、利記係利物浦、Harry Potter喺倫敦搭火車返學,但又想搵個治安好、校網好、好易搵工、樓價合理、生活方便,但又綠草如茵、心曠神怡嘅地方嚟落腳嘅朋友嚟講,到底可以點揀?
小女只會大包圍地分享下英國地區同見解,望帶出多些唔同角度嘅觀點畀大家參考,內容絕冇歧視成分。

揀定居地點可考慮9大因素

1. 口音

英國有好多counties,而每個county都有獨特嘅口音。普遍南部嘅英文比較容易明白,北面嘅例如Newcastle或Liverpool,口音可能對初到英國嘅港人嚟講,需要多點時間適應,因為除咗口音,仲有好多地道slangs要明白。

Liverpool(圖片來源:visitbritain.com)
移民英國住邊好?(圖片來源:visitbritain.com)

2. 天氣

地理常識,北面凍過南面,郊區凍過市區,高山雨水多啲,東面就乾身啲。但整體英國都係又凍又濕,自己衡量下啦!

3. 人種

有general perception嘅就係中部如Birmingham多印度人,南面如Buckinghamshire多有錢人,東北面多chavs,曼城多香港人。呢方面都幾影響治安、學校質素同市區配套,建議上網做完research後,親身來感受下。

4. 住屋環境

同大部分國家一樣,愈近首都,住屋就愈貴。咁當然,就業機會多啲,又多啲娛樂,又近唐人街,多啲家嘅感覺。但大家可以考慮下移民到英國是否想過番香港嘅大都市生活,定係鄉村啲嘅農場生活,還是suburban啲嘅簡單生活,定海邊啲嘅自由生活。我想講嘅係,英國版圖很大,倫敦以外都有好多就業機會或創業嘅可能,所以都值得跳出框框考慮多方面啲。

圖片來源:visitbritain.com
移民英國住邊好?(圖片來源:visitbritain.com)

5. 樓價

樓價普遍南面貴過北面。但有些地區如旅遊區,海邊(英國人對海邊非常瘋狂)或area of exceptional natural beauty,例如lake district, Cotswold等,樓價都會被local人搶貴晒。咁到底住house好定flat好?獨立屋定排屋?二手樓定new built?點揀有potential住宅?遲幾個post再講。

6. 投資

可留意下英國政府未來幾年會對邊個城市有重點發展,例如起鐵路、市區regeneration,有機會提升樓價同優化生活配套。又或想做物業投資嘅,咁可揀就業機會多嘅城市,來放租畀young professional couples,或附近有出名學府嘅城市來放租畀學生。

7. 就業

就業係最多網友關心嘅一項。一定㗎啦!大城市例如倫敦就最多就業機會,但倫敦中心生活指數好高。好多香港人就揀倫敦外圍,因為生活指數相對低啲,同埋可以入倫敦返工。但其實travelling time都唔短,來回可長達1.5小時。如果揀2、3線嘅城市就要有心理準備搵錢比香港少,同埋未必係自己做開嗰行。

圖片來源:visitbritain.com
移民英國住邊好?(圖片來源:visitbritain.com)

8. 學校

每個county都有好好同麻麻嘅學校,可以睇ofsted report做參考。除非你指定子女必定要入某學校嘅,otherwise就可以唔使睇得太重。但要留意某啲移民落腳熱門地區ie Barnet, Richmond, St. Alban,D rate 咗 「outstanding」 嘅state school都可能oversubscribed 晒。遲啲寫個有關報學校嘅post再講。

9. 交通

考慮有冇直通火車到倫敦,因為如果worse comes to the worst堅要去倫敦返工而你唔係住倫敦附近,有直通都叫有幫助。冬天落住雨企喺月台上等轉車,之後廣播話火車delay時,你真係會想跳落去月台算。

圖片來源:visitbritain.com
移民英國住邊好?(圖片來源:visitbritain.com)

另外,近一個國際機場都係一項值得考慮嘅因素。到時要出差又方便啲,去歐洲旅行又平啲。喺英國(倫敦以外)最好識揸車,如果唔係你真係會好lonely。英國啲巴士出晒名唔密、唔準時同唔快。但如果真係唔會、唔想、唔識揸車嘅,建議搵地方近火車站、巴士站同超市,咁冬天出街或買餸時冇咁苦。

以上都係小女少少嘅經驗瑣談同觀察分享,任何選擇都冇一定嘅對錯。純希望可以幫大家喺移英嘅事上從多啲嘅角度了解多啲。

港媽 • 講英

facebook:港媽 • 講英

免責聲明:本專頁刊載的所有移民資訊,只可作參考用途。讀者在作出決定前理應審慎,若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。