撰文：Ryoko｜圖片來源：Instagram、WEAR
一招解決穿搭「特定化」問題！
逐漸步入秋冬季節，而呢兩個季節係最容易出現穿搭「特定化」，同冇新鮮感嘅穿搭！為咗防止變成「量產型」潮人，就要學定以下幾個小技巧喇！
1｜若隱若現
如果對日常嘅穿搭開始覺得悶、冇新鮮感，可以嘗試「若隱若現」穿搭方法。唔需要加小配飾或改變，就能夠令成個人感覺唔同咗！
用大褸稍微將上衣隱藏
秋冬服裝無論如何都好難擺脫整體上嘅厚重感！呢個時候，只需將上衣從大褸之中露出，就能減輕整體厚重感，改善氛圍，增添穿搭嘅俐落感。
要將上衣從大褸中露出，選擇色彩較明亮嘅上衣更好！想露出上衣嘅時候，可以將上衣嘅衣袖摺起，或拉長至凸出大褸衣袖嘅長度。只需露出同整體氛圍唔同嘅顏色，就可以簡單地改變穿搭嘅感覺。
露出頸、手腕、腳踝
對日常穿搭感到厭倦時，亦可嘗試露出頸、手腕、腳踝嚟改變氛圍。牛仔材質嘅情況下，可以闊啲嘅幅度將手袖捲起，從長袖之中露出手腕。
僅僅係露出頸、手腕、腳踝，就可以簡單地從秋冬穿配之中增添清爽感，而且更可提升女性魅力，可以話係一石二鳥嘅做法！
2｜從底下著手
喺平時嘅穿搭中，加入一件單品，就能夠改變整體氛圍！特別於秋冬穿搭之中，同時起到防寒作用，非常推薦呢種小技巧！
One-piece嘅話，就加雪紡裙
One-piece驟眼望落係最難有穿搭變化嘅單品，無從入手之下，好容易令人生厭。呢個時候，推薦喺下半身加穿雪紡裙！
秋冬嘅厚身one-piece，更加適合加入使用咗另一種材質嘅雪紡裙。呢個做法更可同時令one-piece嘅可愛感得以提升。
大褸下加著牛仔褸
即使係已經著到厭嘅大褸，都可以透過喺底下加著單品，從而改變日常印象。特別係最近非常流行嘅牛仔褸，牛仔材質意外地同任何大褸都相襯。將牛仔褸嘅鈕扣全部扣上，能意外地增添可愛感！
3｜更改穿搭單品
如果想解決穿搭「沉悶化」嘅問題，更改穿搭中嘅單品，係最快手嘅穿搭術。唔使改變整個穿搭，只需改變一小部分，就能成功改變整個穿搭嘅感覺。
改變素材
即使話更改單品，都有好多種唔同做法，而秋冬嚟講，最適合嘅做法就係改變著用單品嘅素材材質！
秋冬衣物中，唔少都係燈心絨、軟毛等可愛嘅質料，同完全唔同嘅素材組合起嚟，會發現有好多意外地合襯嘅穿搭組合！只需改變其中一款單品嘅素材，就能夠解決穿搭「沉悶化」嘅問題。
換鞋款
更改鞋款亦係其中一個小技巧。例如將波鞋換成高踭鞋、皮鞋換成靴等，改變一下鞋款，就能令整體穿搭感覺煥然一新！而且秋冬係能夠著最多款式鞋履嘅季節，嘗試配搭唔同嘅鞋款，令穿搭有更多變化，享受襯衫嘅樂趣！
4｜追加單品
想大幅度改變個人氛圍嘅話，加著單品亦係一個非常實用嘅小技巧！正因係可以疊穿嘅秋冬季節，先可以享受更多唔同嘅配搭方法。
加著恤衫
恤衫係秋冬穿搭中最容易加穿嘅單品！僅僅係圍喺腰間已經可以令整體穿搭更亮眼。除咗可以穿出唔同造型感，亦會發現同唔同衣著單品嘅配合性，對於擺脫穿搭「沉悶感」非常實用！
用皮帶束腰
秋冬造型適合用粗皮帶等皮帶類單品嚟襯托。由於秋冬造型厚重，容易令身形望落臃腫。因此，可透過用皮帶束住腰間，突出身體線條，營造出不一樣嘅氛圍。