寵物嘅責任非常大,除咗要照顧佢嘅起居飲食外,更重要係需要不離不棄給予無私愛護。不過日前內地就有狗主將一隻黑色隻綁喺私家車車尾拖行,惹起網民大鬧啊!

撰文:Evita | 圖片:微訊@相知新會 (原文刊於《新假期》)

無良狗主嫌狗仔氣味濃烈而綁車尾

內地江門一名姓滕車主將一隻黑色狗用繩綁喺私家車車尾,私家車一直喺馬路上行駛,而狗狗根本追唔切私家車速度。

狗狗顯露出筋疲力盡狀態,亦趁私家車停喺紅綠燈前趴喺路邊喘氣,相信車主可以從倒後鏡睇到狗狗,不過依然唔畀狗狗登車,最後狗狗繼續被拖行。

過程被旁邊人車主影低上載至網絡,引嚟網民瘋傳,據知同日新會公安將無良主人帶走調查。據滕男交代,當日係首日由寵物店將狗狗收養,但因為狗狗身上氣味太濃烈,因此唔畀佢上車,並將佢綁喺車尾拖行返屋企。

呢個明顯嘅虐畜行為,公安只係對無良狗主懲處2分並罰款100蚊人民幣,令網民大鬧罰得少啊!

 

泰國小象太熱不支倒地

講起虐待動物,根據《每日郵報》報道,有菲律賓遊客於上兩星期到泰國芭堤雅東芭樂園(Nong Nooch Tropical Garden)旅行時,拍攝到一隻小象頸被綁繩,連繫住被正在被遊客騎嘅象媽媽。

遊客指當日氣溫高達攝氏40度,期間小象可能因為太熱而倒地。不過小象瞓低唔夠半分鐘,象媽媽就用鼻掂一掂象仔示意起身工作。

遊客:「樂園內有很多小象被繩連繫母象走來走去,遊客們享受的背後就是象在陽光底下受苦。」

遊客同時表示擔心大小象嘅健康,甚至遭受虐待,希望佢哋可以得到妥善照顧。而東芭樂園發言人就否認大象受虐待或太攰,更話:「所有大象都好健康,待遇好,如果有問題會被獸醫治療。」

而早前就有一隻叫Dumbo嘅小象喺泰國南部嘅一場表演中去世,有指Dumbo每日被逼表演3次,飼養員帶佢到獸醫診所時掃描發現兩隻腳都斷了,再過多三日就去世。

好多時候我哋希望喺旅行中嘗試未試過嘅「玩樂」,但係希望大家喺作出決定前要先考慮動物或其他人嘅感受,以免再有更多同類事件發生。