當你到咗咁上下年紀,幾乎每年都會有機會見番中學同學或識咗好多年嘅朋友。點解?因為大家都到咗結婚嘅年齡,單單係今年,我已經參加咗六位朋友嘅婚宴。人唔到禮都要到?有寒酸嘅親戚擺低份結婚週年禮物,連「禮金」都唔畀?

一對新人為咗擺酒回本可以去到幾盡?

雖然我衷心祝福一對新人幸福快樂,但有一樣嘢,令我變得愈來愈唔鍾意去婚宴……就係「禮金」。

如果係真心朋友,出錢出力做埋兄弟都冇問題,成班兄弟癲番晚,有時仲開心過結婚嗰對新人。不過,如果你邀請我出席,只係想攞「禮金」為咗擺酒可以回到本,我唔去又唔好意思,去又覺得被你劏咗刀咁……

擺酒人情 圖片來源:《燦爛的外母》劇照
圖片來源:《燦爛的外母》劇照

喺香港結婚、買樓、生仔……樣樣都係錢。為咗擺酒可以回本可以去到幾盡?

依家新郎新娘好流行先用WhatsApp 開group,問實有幾多個兄弟姊妹去,再訂酒席同買餅卡,實行一張餅卡都唔好浪費。

擺酒人情 近日WhatsApp就流傳有一名90後的Ig網紅即將擺酒,她透過WhatsApp講到明提醒大家記住要多付人情,引起網民熱議。
近日WhatsApp就流傳有一名90後的Ig網紅即將擺酒,她透過WhatsApp講到明提醒大家記住要多付人情,引起網民熱議。

人唔到禮都要到!

另一個潛規則就係,即使唔派餅卡畀你,人唔到禮都要到。只要你「被通知」有朋友結婚,就需要畀「禮金」,連酒席錢都慳番。

試想像下,有日你一起身,無啦啦被某位好多年冇見嘅朋友加咗入群組,然後被告知佢要結婚,咁你就要交出大利是,成個過程都係被動……

不過講到最傷兄弟姊妹情嘅,莫過於應該畀幾多錢人情先合理。有啲新人比較厚面皮,會喺群組講明要求最低入場費八百,做兄弟更加要畀一千。仲記得五、六年前仲考慮緊畀三百定五百,香港真係乜都通脹。

擺酒人情 圖片來源:《我要做model》劇照
圖片來源:《我要做model》劇照

寒酸親戚一家五口畀一百蚊……

曾經試過有朋友唔願畀咁貴,開口問新娘:「我哋朋友就要畀八百,想問你啲親戚帶埋一家大細嚟飲,會畀幾多?」

冇錯,親戚去飲係最著數,帶齊小朋友都係畀一份錢,有寒酸嘅親戚擺低份結婚禮物,連「禮金」都唔畀。

難為成班兄弟姊妹為咗「禮金」傷感情,其實好大程度都係想填番親戚條數。最誇張試過畀一百蚊,帶埋一家五口。廿蚊一位十幾道菜,你話去邊度搵吖~

擺酒人情 圖片來源:《我要做model》劇照
圖片來源:《我要做model》劇照

圖片來源:《燦爛的外母》劇照