撰文：Katie｜圖片來源：unsplash｜原文刊於《經濟一週》
2.2萬大公司 vs 2.8萬細公司
日前，有人於討論區以「選擇題 22k 大公司定28k 細公司」為題開post，指自己有兩間公司的offers，不知應如何選擇。
1.「2.2萬，大公司就輕鬆啲返5日，啲嘢做慣做熟，學嘅嘢都差唔多學晒，有時忙起上嚟都要OT，不過有補水。」
2.「2.8萬，細公司就返5.5日，部門得幾個人，做嘅嘢會多咗，可以學到唔同嘅嘢。」
網民：返5.5日同返6日有咩分別？
樓主帖文一出，不少網民熱烈回應，大部分人一面倒勸樓主應選擇大公司、人工較低的offer。不少人指，就算細公司人工高，惟返足5.5日，寧可選擇人工低但返5日的工作。
- 「5.5日同返6日有咩分別？」
- 「5.5日即係周五人人relax，你仲要第二朝爬起身喎！」
- 「你返到屋企加食埋飯起碼都三點啦……我識所有返5.5日嘅人基本都係當返6日。」
- 「返5.5日……放一日假好似冇休息咁，都唔知邊個發明返足6日。」
- 「放多一日，個人生活充實好多！」
- 「叫你返5.5日， 做唔晒又咪要OT ，跟住做足全日。」
細公司不穩定、福利少 對將來搵工冇幫助？網民指，兩份工作日薪僅差166元
又有網民表示，細公司人工雖然高，但福利較大公司少，且細公司或會隨時變更政策，分分鐘今日人工2.8萬，聽日人工2.2萬，最後得不償失。更有網民將兩份工作的日薪比較，稱細公司與大公司的日薪差距僅166元，認為樓主不應選擇細公司。
「22,000/22 = $1,000/日 vs 28,000/24= $1,166/日
為咗毎日多166蚊，又要畀多4日車錢早起身冇Happy Friday，值得咩？」
- 「細公司加5.5日已經不了，仲要呢個環境細公司隨時執。」
- 「最大問題細公司今日就答應你2.8萬，但可能唔夠一、兩個月，覺得冇咩生意，轉頭就會直接炒人都唔出奇。」
- 「細公司人工高啲係因為包埋醫藥費。」
亦有網民稱，細公司的工作經驗對將來搵工沒有幫助，又認為細公司的學習機會不一定多。
- 「細公司、香港公司、返5.5日，你入到去都好快quit；攞住細公司嘅經驗去大公司又會睇低你，一樣壓番你價。」
- 「細公司學嘢係昆人，冇制度、冇叻人帶你做，公司做大畀你管都管唔掂！」
- 「你肯定你學晒所有嘢？大公司咁多職位又多機會，有冇諗過調職可能可以升職或者搵多啲？」
細公司人工高 將來轉工可叫高價？
雖然大部分網民一面倒勸樓主應選擇大公司的offer，但有網民卻認為細公司的人工較高，樓主可以先返細公司，未來轉工，叫價可以高於2.8萬；反之，假若樓主選擇大公司2.2萬的offer，將來轉工後的人工亦未必可以增加至2.8萬。
- 「細公司做住先，因為你下一份工嘅人工會同呢一份有關，同時搵番5日可以offer你2.8萬嘅工。」
- 「梗係2.8萬啦！再轉大公司就有得叫高過28k。」
- 「6千差好多，3千內就唔會諗。往好嘅方面諗，返多半日少啲機會使錢，細公司少啲辦公室政治，學多啲嘢，下次轉工可叫價高啲！」
- 「6千其實唔少錢，你放假4日搵唔搵得番呢啲錢？你每個月儲多6千，其實一年都7.2萬，投資下一年差10萬。5日工一定係舒服，但係我會揀6日2.8萬，之後跳槽，人工又可以叫高啲！」
- 「揀2.8萬，做半年轉工，叫價能力起跑線已經 喺你2.2萬嘅20%以上，下份工唔使同人講自己返5.5日。」
- 「2.8萬做一年再搵工！2.2萬之後再跳都未必有2.8萬。」
不過有網民卻認為，樓主在作出決定前，應衡量自己的需要，假如有經濟壓力，應選擇人工較高的細公司；若沒有經濟壓力，可依照自己的心意決定。
- 「要睇自己嘅狀況同埋想要啲咩，樓主話自己廿中，如果要準備成家立室，自然有經濟壓力，咁當然2.8萬；但如果有家底，唔憂柴憂米，冇打算成家立室，當打風流工，咁咪2.2萬。」
- 「而且應該睇比例，舉例而言，如果7.2萬對7.8萬，咁6千算得上咩錢，我就會選7.2萬而唔係7.8萬；但2.2萬對2.8萬，差別算明顯地大。」
- 「跟番自己心意最好！」
