當我第1次知道要跳那個「玩命鞦韆」的時候, 其實我是拒絕的!因為我覺得……不能叫我跳、馬上跳,第1,我要試一下!你拍完以後加了很多特技,那鞦韆彈啊……很遠!很高!很正!結果讀者出來一定罵我,根本沒有這種鞦韆!

text : hoilee photo : Wyman、相關機構 design : 4th

放心!記者親身試完,何止唔「流」,直頭失魂斷片!新西蘭本應是樂山樂水的度假勝地,爛玩如我偏向險中行,精選新西蘭刺激活動3個世界之最,包括最大峽谷鞦韆、最斜生態飛索以及最長草地飛球,腎上腺素負荷飆頂!

01 | 嗌爆玻璃榜首!160米深谷盪鞦韆

論新西蘭的玩命教主, 當然是笨豬跳始祖公司AJ Hackett,但記者略嫌笨豬跳的傳統失重體驗唔夠驚喜,而且高度只屈居全球第3,去澳門跳好過!千里迢迢嚟到當然鬥最大,離地160米的峽谷韆鞦韆聽落就啱數,仲有得孖公仔齊齊跳,尖叫分貝雙倍上!

穿過搖搖曳曳的吊橋赴「刑台」,腳步突然好沉重!步入跳台,被壯觀的深谷嚇到「標馬尿」之際,工作人員已用安全帶繫實我下盤,準備上吊吧!望住身邊素未謀面的職員,即將成為我跳崖的生死之交,玩過不下廿次嘅佢,睇怕感受唔到我内心的忐忑。

「你哋想倒數定我直接撳掣?」殊不知一答:「Countdown 呀呀呀!!!(回音)」就筆直急墜深谷,又話有得揀,你呃人!

笨豬跳純屬自願,鞦韆卻是將處決大權交託俾工作人員,睇下旁觀的花生友幾招積!

普通跳崖已經滿足唔到一班地球人,嫌向前或背向揈未夠過癮?雙人花式變化多到你估唔到!只要你敢試,工作人員無任歡迎!呢班死士將「笑看人生」的態度發揮得淋漓盡致,好值得大家學習!

最高時速:120km/hr
全程曆時:25秒
驚嚇度:★★★★★

Nevis Swing Queenstown

地址:Station Building, Corner of Shotover and Camp Street, Queenstown
電話:+64-(0)800-286-4958
營業時間:星期一至日7:45am-8:00pm
價錢(單價)雙人跳每人NZD175/HK$926(留念相片及影片需另加NZD80/HK$423)
交通: 從皇后鎮乘40分鐘穿梭巴至峽谷跳台,每日運作時間為9:20am-2:40pm
網上報名:www.bungy.co.nz(提前1日預約)

化身泰山 一嘯怒衝790米

留守皇后鎮市區,走唔甩搭吊車上海拔790米的山頂飽覽市景, 至於回程, 我揀用自己方法飛落山!
Zipline 越嚟越普及,源自加拿大的Ziptrek 加入行山元素, 刺激之餘更耗體力!最長的鋼索雖然留守起源地,但最斜的生態飛索就落在新西蘭Bob’s Peak!

得天獨厚的打卡位莫過於我身後的Lake Wakatipu 湖景,不自控地360度旋轉包保冇死角,腳揈揈凌空歎景確係爽!原本只需10分鐘的纜車路程,改為自行充當「人肉吊車」Z 形瀡落山腳,變相用咗 3 個鐘,實不相瞞,我呢隻「無腳雀仔」都飛到虛脫!

堅離地!3小時飛翔消耗戰

全長950米的路程分成6段,恐怖度由淺入深,速度感雖然不及Swing,但高度足以嚇到腳仔軟!仲要鼓起勇氣跳6次, 你都咪話唔攞命!

高海拔的清新空氣,加上一次又一次心跳加速的飛身,子彈般穿插綠意盎然的樹叢,舉頭巨木參天,浩瀚絕景的張力將畏高心情抹得一乾二淨!最尾1段斜度達40°,據說是全球最斜的吊索紀錄,時速達70公里,難怪樹林傳出哀嚎慘叫!

歷程 3 個鐘實在長到不可思議,但成功用「空中飛人」姿態征服790米峭峰,確係令人飄飄然嘅!

死後感言

雖然路程分為初級和進階版,前者玩少1個鐘相對輕鬆,但就錯過咗湖景位同滑得最快的1段,再揀我都會一氣呵成碌落山腳!來自荷蘭的教練Inge好鬼馬,隔個路段就教新招,如倒立、Trust Fall般向後瞓等,3小時全無悶場!

最高時速:70km/hr
全程曆時:3小時
驚嚇度:★★★☆☆

Ziptrek Ecotour

地址:45 Camp St, Queenstown
電話:+64-(0)3-441-2102
營業時間:星期一至日 8:30am-6:00pm
價錢:( 4段路線)NZD85/HK$450、(6段路線)NZD135/HK$714

交通:乘Gondola吊車至山頂,步出商場後向左走100米
網上報名:www.ziptrek.co.nz(提前1日預約)

海嘯級肉搏!稱霸全球倉鼠跑

平時睇倉鼠跑滾輪好可愛,但原來換轉人類設身處地係會崩潰㗎!源起自新西蘭的透明大彈波,前年網上瘋傳1條參加者集體狂奔被輾的短片,立即心郁想碌埋一份!目前紐國只有距奧克蘭3小時車程的羅托魯瓦有得玩,記者乘機拜會發明呢個變態game 的創辦人真身,再即席試玩全球最長軌道,滑水暴走350米!

臨場仰望草坡的龐大規模,直徑3.2米的巨波彈住落山,透出兩個左右搖晃的鬼影,不禁想縮沙走人……可惜我不入地獄誰入,工作人員爽手注水開閘,我就開始喺裏面飛彈,洶湧水花撲面,雙眼淹水完全擘唔開,顛簸的彎路跌碰足足3分鐘,想收買人命咩!

死後感言

之前喺墾丁試玩過綁手捆腳的草地飛球,波身冇咁高,但玩法更慘無人道,連新西蘭始祖都已經因安全問題取消咗!剩低的兩直一曲軌道,直的坡度較斜,碌得快而平穩,彎路迂迴曲折,兩人互撞似打仗,由頭濕到落腳!

最長跑道:350米
全程曆時:3分鐘
驚嚇度:★★★★☆

Ogo Rotorua

地址:525 Ngongotaha Rd,Fairy Springs, Rotorua
電話:+64-(0)7-343-7676
營業時間:星期一至日9:00am-5:00pm(夏令延長營業至6:00pm)
價錢:(直+彎Combo)每人NZD80/HK$423(相片及影片需另加NZD50/HK$265)

交通:從市中心乘10分鐘的士,經過Skyline Roturua纜車站後即達
網上報名:www.ogo.co.nz(即日預約亦可,網訂可享95折)