撰文：潘小熊｜圖片來源 /攝影：Janelle、由受訪者提供
第一次遊日 遇見恐怖日本！
Q：第一次去日本是何時？和誰去？
小儀：人生第一次坐飛機亦是第一次去日本，就是去東京，記得那年是中五畢業，跟最要好的女同學去的，當時仲好大膽自由行玩了七天，在東京都係好似一般人咁去新宿、原宿、涉谷四圍行街⋯⋯當時，有個auntie是做日本帶團的，我哋就跟住去富士山玩，點知最恐怖的事就發生咗⋯⋯
當時我哋跟團認識了新朋友，晚上約好一齊在房間玩啤牌，記得當時入住的是傳統榻榻米房，恐怖的事好彩不在我房內發生。我哋去到新朋友的房間，明明大家都是兩個女仔住，一入佢哋房，就見到放了十幾對拖鞋，有大人又有小朋友用的，我哋當然唔敢出聲啦！傳聞如果好猛的房間，有幾多隻鬼，就有幾多對拖鞋⋯⋯好彩，那晚冇特別事情再發生。
Q：遇過恐怖事仍喜歡日本？
小儀：其實去過一次東京就上了癮，入了商台後，情況更嚴重，全部903同事都好喜歡去東京，我哋會跟著Wyman、軟硬一張秘密手繪地圖去搵日本精品，好似當年好hit的透明吹氣一人梳化，我睇番本護照，最瘋癲時，可以三日兩夜甚至兩日一夜都要去一去東京。去得最多時一年去四、五次，唔算好瘋狂，依家可能一年去兩、三次左右，每次要清假或是生日trip都第一時間想去日本。
Q：有甚麼最瘋狂的事在日本發生過？
小儀：試過同903同事齊齊偷走去東京玩，那次仲有森美，個個都鍾意玩。去到東京唔甘心只係行街購物，成日諗無聊嘢來玩，試過玩鬥取得多紙巾，以前東京好多人喺街頭派紙巾宣傳，我哋就玩鬥取得多，而且不准重複才算贏。
Q：去過日本哪些地方？
小儀：去得最多都係東京，讀大學時就去過廣島、京都，仲有拍嘢時去過沖繩，同埋六月咩都冇的北海道等都有去過。反而這兩年識了一批鍾意睇景冇咁鍾意shopping的朋友，就去多了九州，可以自駕遊慢慢嘆。
Q：日本有甚麼吸引你一去再去？
小儀：就算每年都去睇櫻花，每年都會有唔同的感受，每次都可能有唔完美，又有不一樣的開心，未睇到已經好刺激。又或睇紅葉我都好開心，試過落住大雨睇紅葉，以為好掃興，不過日本朋友告訴我，其實落雨時睇花睇葉，顏色會特別靚，日本人這些能夠改變態度去欣賞不同事物的特質叫人好欣賞。
為了美食 可以去到幾盡
Q：小儀出名愛吃，東京旅行會瘋狂吃嗎？
小儀：會呀！最近一次遊東京，出發前已定下目標是為「食」，要吃得好就要提早訂位，在過程中學多了日本文化。例如我們透過在日本工作的朋友訂位，某些餐廳一聽到是替外國人訂位就拒絕，要求須由酒店代訂，酒店又會要求先要付信用卡資料等，好像深怕遊客甩底。但原來某些餐廳是怕不懂英文，溝通不良會招呼不周，日本人對要做得令人滿意好有執著，不只是為錢。
Q：有哪些東京餐廳是你的心水推介呢？
小儀：今次出發前睇了一個日本電視節目《和風總本家》，本身那是一個講和風事物的game show，集集不同美食主題，又會邀請廚師上節目講解，我抄下了多集notes跟住去訂餐廳，後來發現，原來好多是好有名的，就跟著去吃。另外，拍節目時去過兩間不錯的拉麵店，自己去玩都有再幫襯。
01｜江戶前壽司──鮨一新
在淺草的鮨一新，是得過米芝蓮一星的江戶前壽司，江戶前壽司的重點是魚鮮會做過熟成處理，可能會醃過、漬過等，我本身不愛吃濃味魚，但估不到這裡的好啱吃，除了拖羅外，都吃晒。
（地址：東京都台東区浅草4-11-3）
02｜米芝蓮天婦羅──近藤
其中一集講解天婦羅，去了一間不少人都知的名店近藤，是三星米芝蓮，店主七十歲都繼續日日在炸天婦羅。不過記得訂位時，最好講明要訂近藤師傅主理的，另一邊是徒弟主理的，雖然都好好食，我哋今次大頭蝦，忘記了註明，又忘了訂他們的名物炸厚番薯，平日一般吃到的炸番薯都是薄片的，這裡有近兩吋厚，因為要炸近30分鐘，要一開始就先點。雖然今次吃不到，不過正好畀個藉口自己下次再來。
（地址：東京都中央区銀座5-5-13 坂口ビル9/F）
03｜雞湯拉麵──ねじ式
此店室內黑黑的，又放有很多figures，好不一般的拉麵店，好有漫畫feel。賣的是超濃厚的雞湯拉麵，濃厚得會黏著嘴，吃麵時，亦會多給你一隻像篩的湯匙，方便大家吃到湯裡的免治雞肉。
（地址：東京都渋谷区幡ヶ谷2-47-12 田口ビル1/F）
04｜慢煮叉燒拉麵──金色不如歸
另外一間拉麵店位於同一條街上，是間長龍排隊店，既是米芝蓮推介，又是當地拉麵得獎店。此店當然夠出名，不過大家記得每星期有2日是賣特別口味拉麵，周末有時會有中華風拉麵，而平日的湯麵其實都好好味，除了豬骨及雞湯，更加入了蜆及大量蔬菜，令湯帶甘甜，加上那慢煮的叉燒好軟熟，拍攝以外，我自己都有再去吃。
（地址：東京都渋谷区幡ヶ谷2-47-12）
東京以外 私心景點推介
Q：東京的美食以外，有咩好玩？
小儀：最近一次又去了鎌倉，除了大路的鎌倉大佛外，我們去了一個好特別的佐助稻荷神社，好啱香港人，我稱之為「洗錢神社」。那裡有個傳說，相傳用神社的聖水洗錢，可以賺雙倍，大部分參拜者都是洗洗硬幣，不過真的有日本人拿出一萬円紙幣來洗，最好笑是見到有人連信用卡都出動！而入神社的路都神秘好玩，要先瓹山窿，才到鳥居路，才再看到這個位於山下的神社，值得大家去發下財！
Q：聽說你最近愛上九州自駕遊，有甚麼推介？
小儀：高千穗是一處我本來沒甚期望，但一去就愛上的地方。還以為玩撐船仔冇咩大不了，但那條河流不同深淺的藍色好靚，買包餅仔餵水鴨又好可愛，加上那陽光折射的關係，那裡簡直是「彩虹放題」，隨便用手機影相都好靚。另外一個秘秘是糸島（絲島）的夫妻岩，從白色鳥居直望出大海，一大一小的岩石就是夫妻岩，潮汐漲退看到不同景致，本來我們那天去天色不好，不過就因此沒甚麼遊人，隨便都影到明信片般的相，加上附近有不少餐廳，夏天還可以滑浪。今次我冬天出遊，糸島更有牡蠣小屋，即燒蠔小屋，只在秋冬蠔季才營業，燒蠔超甜美，想不到九州好食又好玩。