【生活健康】香港打工仔出名工時長,成日要開OT做嘢。但好難成日時時刻刻都咁精神、有集中力喎!想提高注意力嘅時候,多數會諗到飲咖啡,不過,傳聞飲咖啡好傷胃⋯⋯咁你就要睇睇日本醫生點講,教你「咖啡最強飲法」!

撰文:Car|圖片來源:《林修の今でしょ!講座》

1|咖啡功效

眾所周知,咖啡中含有嘅咖啡因有醒神作用,而且亦有提升集中力嘅效果。但呢啲只係一時嘅短暫性效果,長遠嚟睇,咖啡更加可以保持血管同腦部健康!

心肌梗塞同腦中風係常見都市病,主要係因為血管酸化,導致動脈硬化並變得脆弱,有機會引致「爆血管」嘅危險。而其實,咖啡係可以有效預防呢類疾病!

咖啡因多數畀人一種負面印象,但實際上對血管有良好嘅功效。咖啡因可有助血管擴張,令血液流動暢通。對腎臟血管嘅擴張更是有效,能強化過濾血液嘅功能,令血液保持乾淨健康。

除咗咖啡因,另一種健康成分稱為「綠原酸」。綠原酸帶有抗酸化作用,可有效保護血管,防止因酸化而引致爆血管。綠原酸既可以保護血管,亦都有保護腦部嘅功效。

愈來愈常見嘅腦退化症,其中一個原因,係腦內被稱為Amyloid Beta嘅物質堆積。而綠原酸則可有效清除Amyloid Beta,令腦部保持健康。

但係醫生建議,由於小朋友嘅腸胃較弱,唔建議小學時期就開始飲咖啡。孕婦亦應該先徵詢醫生意見,先至好飲用咖啡。

2|一日應該飲幾多杯?

醫學調查中,以9萬人為追查對象,並持續觀察咗20年!發現1日飲3~4杯咖啡,對人體健康最為適當,而且可有效降低腦中風、心肌梗塞等死亡風險,同時亦可減低65%腦退化症嘅發病風險!身邊有冇朋友成日好健忘呢?快啲叫佢飲多兩杯咖啡啦!

但留意番,醫學調查顯示,一日飲5杯或以上咖啡嘅話,係反而會增加咗死亡或患病風險!所以唔係飲得多,就等於好嘅!

3|飲咖啡嘅最好時間係幾時?

節目組搵來不同年齡階層人士進行實驗,測試餐前、餐後飲咖啡,身體嘅血糖值分別會有咩變化。然後調查發現,餐前飲咖啡可以有效抑制血糖值上升。一大早飲嘅話,更加可以將一整日嘅血糖值穩定落嚟。呢個作用,亦係來自綠原酸。

另一方面,如果為咗提神而飲咖啡,可於工作或溫書前30分鐘飲。數據顯示,咖啡因會於飲用後30分鐘開始見效,飲用3小時後,效用達到頂峰,而第4小時後就開始消退。換句話說,想要唔影響睡眠咁飲咖啡,記得瞓之前嘅4個鐘頭就唔好飲喇!

4|咖啡點飲最健康?

醫生指,飲黑咖啡對身體最好,但如果擔心會「削胃」,可加牛奶或豆奶沖調,但就唔好加砂糖!因為加咗砂糖,就會令血糖值提升,對身體唔好。而且,要加奶嘅話,加豆奶嘅營養值比牛奶更加豐富!

根據外國嘅研究,將不同多酚類同時攝取嘅話,營養值會更高,功效甚至可高達10倍!而豆奶同咖啡都含有呢種物質,一齊飲就會起到相輔相成效果,豆乳亦同時帶有抗酸化作用,有效保持血管健康。

口痕想搵零食送咖啡嘅話,醫生更推薦黑朱古力同果仁。因為可可豆中含有可可多酚,有效提高營養值,可可豆含有量愈濃,可可多酚就愈豐富。

果仁則含有卵磷脂,可有效保護腦神經、心血管及肝腎等系統。反正都要食嘅話,醫生更推薦食雜錦果仁,營養更加平衡。

延伸閱讀:午餐晚餐正常吃!早餐烚蛋減肥法 10日自然瘦2kg

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡