有冇聽過Ashikaga Flower Park 足利花卉公園 ?就算冇聽過,如果冬天去東京的話,都應該會見過下面呢張相!每年呢個公園都會力sell自己係「全國燈飾第一位」、「日本夜景遺產」之類,加埋張(好似)好靚的相,搞到唔少遊客都心郁郁想去睇下!老實講,做咗日本線的旅遊記者咁多年,見到啲相都覺有「伏味」!但話說去年日本冬天氣溫太高、冇雪落,搞到本來打算去滑雪嘅我唔知去邊度好,最後都係去咗「自投羅網」!

伏一:好。很。遠!

唔好話足利市,好多香港人連櫪木縣喺邊都唔知!總之位置大約係喺東京的北面,中間隔住咗成個埼玉縣!雖然,官網話開車90分鐘可以直達,但我之前上網check過,唔少日本人都表示沿路好塞車,所以,我決定坐火車(長征)去!由新宿出發,齋坐火車已經要個半鐘,之後仲要喺「足利市」站轉shuttle bus,雖然免費,但每個鐘得一班,車程又要30分鐘,計埋等車,足足要2個半鐘(即係來回5粒鐘)!

伏二:好。很。凍!

雖然冇雪,但唔代表唔凍呀!當晚氣溫應該得單位數字,而且大風到刺骨,吹到頭都痛!所以呢,就算好靚,你都想以最快速度離開!不過全場面積約8.2萬平方公尺,你要行一轉,就算唔多影相(我凍到唔想攞隻手出來),起碼都要行個幾鐘!又要夾番shuttle bus的時間,所以留個半鐘左右就急急腳走!

伏三:似。行。花。市!

好,講番燈飾!無論係網上面的相,定係廣告入面的相,燈飾都好澎湃、好立體!去到現場呢?其實相當疏落,而且好2D,唔少燈飾都係掛喺鐵絲網上,好似維園年宵那個「恭賀新禧」燈牌一樣,雖然都會閃閃下,但感覺相當low-tech!

總結:唔應該專程去!順路就可以考慮下!

其實呢,燈飾唔係唔靚,有啲位影相都呃到下人!例如立體金字塔,加埋水中的倒影,都幾靚嘅!但如果要來回用5粒鐘坐車去的話,我就覺得唔多值得!不過,由依家到2月都可以睇到燈飾,如果租開車去櫪木摘士多啤梨,夜晚都可以考慮順便去睇下嘅~

足利花卉公園:www.ashikaga.co.jp

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡

去東京有什麼好去處及景點推介?

未諗好去邊好,可以看留意東京自由行最新大行程東京必食美食淺草橫町美食街東京年度拉麵店東京蟹店推介。想去東京迪士尼的話,大可一看東京迪士尼樂園門票攻略領取全新3大門票Pass方法。喜歡購物則可到東京Outlet;要是想過一個輕鬆的旅程,可到箱根溫泉旅館。準備到日本賞櫻花的大家,可預先一看日本櫻花花期預測