01 | 航班延誤幾耐先有得賠？賠幾多?
一般情況下，旅遊保險會因惡劣天氣、工業行動、騎劫及交通工具機件故障等所導致的航班延誤賠償$200-300 不等。
不過，延誤的時間最低限制則有所不同。滙豐（安盛）、恒生（昆士蘭）、豐隆旅保會就延誤 6 小時賠償$250，而美亞保險的索償門檻較低，延誤滿 5 小時將賠$300，
索償門檻最高則為三井住友，要延誤 8 小時才會賠償$250。不過要留意番，早前有港人因颱風導致行程延誤 50 小時仍然不獲賠償，原因係颱風於投保時已經存在，所以大家買旅保記住唔好出發前半日先嚟買呀！
02 | 因航班延誤而滯留外地，又要租多晚酒店，保險包唔包？
如果因航班延誤而滯留外地而需額外交通費用同租住酒店，多數公司都會作出實報實銷的住宿及交通賠償。
萬一真係心急等唔切，要另外買其他航空公司機票或轉飛其他目的地返港，亦可獲交通賠償。
其中藍十字保險的尊尚計劃提供上限 1 萬元的交通費，以及上限 2,000 元的海外住宿費，賠償額最高。
惟滙豐（安盛）、三井住友、豐隆旅保不設以上賠償。而提供額外費用賠償的公司均表明，現金賠償與額外賠償只能二擇其一，大家要留意番喇！
03 | 等到冇心情去！取消行程旅保賠唔賠？
其實，保險公司只會在以下情況，先會就取消或縮短旅程的損失作出賠償，包括：
受保旅客需出庭作證；出任陪審團；被強迫性隔離（如懷疑染病或隔離檢疫）；直系家人（有的包括未婚夫/妻）、同行夥伴、生意夥伴遭遇身故、嚴重疾病、嚴重身體受傷；出發特定日子內住宅受水災或火災嚴重損毀；出發前 7 日旅遊目的地被香港保安局發出黑色外遊警示。
不過有個別保險公司，會向航班延誤太久而決定取消行程的投保人作出賠償，一般延誤至少 10 小時。
如安達及三井住友，而藍十字保險，會賠償旅客因預先繳付而被沒收的旅費及住宿費，上限為$3,000。
04 | 唔買旅保，航空公司會唔會就航班延誤而賠償呢？
根據飛行條款，惡劣天氣或航空交通管制引起延誤，航空公司並唔一定會賠償。除非延誤是基於航空公司自身原因（例如機件故障）而導致取消或延誤航班。
多間航空公司如國泰、中華等均承諾會安排旅客乘搭其他航班，免收額外費用；乘客亦可安排退款。
不過，近年港人熱愛的廉價航空大多不能退票，而更改航班亦均需額外負擔手續費，如捷星、虎航等。而香港快運及樂桃航空則為例外，颱風天航班被取消，退票（樂桃需付約$80手續費）或改期皆可！
05 | Claim 保險 邊啲文件要帶齊？
除咗填好索償表格，謹記向航空公司拿取航班延誤證明同延誤航班本來嘅電子機票，最好備埋購買帳單，萬無一失！
仲有！
最近富衛同7-Eleven合作，全港首次推出便利店有售嘅旅遊保險，3 款投保計劃，絕對足夠涵蓋 16 日或以下嘅旅程。保險啟動步驟亦非常簡單，上網輸入代碼後即時生效。另外，旅遊卡另一好處就係抵買！投保 6 日保險卡售價為$120 ，反而上富衛官網購買就要$175 ，平好多！以後買旅保就唔使信用卡過數咁麻煩，去 7 仔嘟一嘟都買得，勁方便！