去旅行喎,駛咁多錢去玩,去到景點唔自拍放上網同朋友仔開心 share 點對得住自己呀?但,你有冇諗過影張相,分分鐘會令你惹上官非?其實,全世界有好多地方影相嘅限制,怪到你估唔到,唔想出去旅行懵下懵下違規,就要注意以下 4 大「禁聞」,否則罰錢或者沒收相機就掃慶啦! 

【巴黎】禁 share 鐵塔夜照
一講到巴黎,大家都會即刻諗起艾菲爾鐵塔,特別係夜晚亮燈後感覺超浪漫,唔少人仲專登帶埋腳架去影夜景,上網隨便搵下都有一大堆靚相。不過,原來艾菲爾鐵塔夜晚係唔!可!以!影!㗎!朝早大家點影都得,但晚上亮燈後,鐵塔上的照明係屬於原創者嘅財產,如果想影完同朋友分享,除非得到所屬公司(the Eiffel Tower’s operating company, or SETE)許可,否則就會觸犯版權法㗎!

嗱嗱嗱,官方網站寫到明㗎!唔係流料!

【日本】迪士尼禁自拍神器
近期日圓暴跌,唔少港人都打算趁聖誕假期飛一轉東京入主題樂園過夢幻聖誕。一場黎到迪士尼又點少得同成班朋友仔影下相?以為帶定自拍神棍入場就可以不求人自拍?錯錯錯!原來東京迪士尼一早有明文規定,腳架係不准入園,就連近期hit爆的自拍神棍都無情講,想自拍?諗下計仔啦!
圖片來源:jtb

【比利時】 原子球塔要打格?
版權法有幾緊要?睇下 wiki 大神都要將比利時布魯塞爾地標「原子球塔」變成一片黑漆就知啦!好多歐洲嘅地標,為咗保障創作人嘅權益都明言唔俾影相 post 上網,即使可以 post 都要注名版權或創作人名。

【西藏】布達拉宮   過千攝影費
西藏拉薩嘅布達拉宮,幾乎係全球性地標,很多人亦知道殿內嚴禁拍照,正當大家以為是保護古蹟,事實卻竟然是搵銀?有 blogger 就報稱,原來入面各個宮殿都有人專收攝影費,不過係逐個宮同你收,計落總數仲貴過入場費,條數咁和味,睇嚟真係土豪先玩得起!