試過多次同行家出差,佢哋多數食飽先上機,一坐低就瞓覺,唔食 飛機餐 ,係因為選擇唔係雞就係魚,唔係乾爭爭就係杰撻撻芡汁, 令人食慾不振。不過阿珍就好鍾意試飛機餐, 因為可以睇下航空公司點樣對待啲客, 頭盤係切粒西瓜定大蝦沙律、甜品係 KitKat 還是Häagen-Dazs,一睇就知蔗渣定燒鵝!

01 | 飛機餐都要本土?識食去程先食

機艙空間有限,大部分香港空廚主理嘅 飛機餐 只會在去程航班上食到,回程則用當地供應商,公關當然會話「外站飛機餐都有嚴格要求」,但外地煮中菜怎及香港?所以阿珍有個習慣,去程必食中菜,回程就睇當地有乜嘢菜耍家!

02 | 存放逾十幾小時,飛機餐特別重口味?

幾年前試過去國泰飛機餐廚房試菜,嗰日我一共試咗 4 款中菜新 menu,欖菜銀鱈魚好juicy,獅子頭都幾惹味,經濟艙有得食嘅咖喱雞同柱侯牛腩都唔錯。原來一般飛機餐由製作到上機閒閒哋存放十幾個鐘, 離港後兩、三個鐘先派餐,翻熱食物再加埋乾燥環境,空廚大廚話菜式會煮得濃味一點, 令乘客在高空三萬呎仍食得滋味。

03 | 頭等試臘味煲仔飯

除咗普通 飛機餐 ,阿珍仲試過頭等先有嘅頭盤冰鎮鮑魚同南北杏木瓜瘦肉湯,夠晒滋潤!餐酒仲配有波爾多列級酒莊紅酒, 不過我最想試瓦煲上枱嘅臘味煲仔飯, 希望呢世人有機會坐一次 A1 啦!

04 | 專人派特別餐

有個空姐姊妹講過,好多客都會柯打特別餐,每份餐都要專登由人手派餐,話說有次某專欄作家寫完印度餐好好食之後勁多柯打,派餐派到手軟,哈,唔知我咁寫出來,又會唔會……

05 | 環球飛機餐盤點

想睇下全球航空公司嘅飛機餐,可以上AirlineMeals.net呢個環球飛機餐Openrice網頁,冇得食,睇下都過癮! 原來國泰頭等有龍蝦供應,新西蘭航空嬰兒餐仲會跟尿片!