北歐國民底褲品牌Björn Borg 由著名網球運動員波格創立的品牌,廿多年來由一條底褲發展到開拓埋衫褲鞋襪市場,還不忘將家鄉的文化傳送到世界各地,甚至連北韓都唔放過!就等Björn Borg 帶我們潛入 北韓 ,一窺朝鮮最鮮爲人知的性感内幕!

文章原刊於《新假期》周刊 | 圖片來源:underu.com

票選「全球最需要情慾國度」網民突襲!北韓入選!

一切源於某場「玩大咗」的網絡公投 — 北歐國民底褲品牌Björn Borg曾於數年前於網上進行公投活動,票選「全球最需要情慾國度」,「性」出者可獲得Björn Borg 空降底褲450條!

翻查數據,原來在投票活動結束前一星期,網站被南韓網民突襲,一夜間暴投萬票,到目前爲止,大會都仍然諗唔通點解,只能估計當地人民血濃於水,想爲北面的同鄉送上溫情。

春光乍現 搞鬼短片

一向鍾意玩嘢的Björn Borg,在活動推出之初,還拍咗條懶神秘的宣傳短片,金髮型男索女性感空降,兄弟姐妹們,接招! 僅半分鍾的短片一開首便有一架軍用戰機劃破長空,唔講仲以爲係軍事紀錄片! 鳥瞰麥田捕手般的田野,下一秒,綠色會否化爲粉紅色? 穿上全副武裝的軍人準備跳下,畫面所見,腳仔好似有啲震喎!

卧底朝鮮派日誌!

以下轉換「第一身角度」,重溫「Björn Borg 臥底」潛行北韓的心路歷程:

Day 1 入境篇 | 導遊全天候貼身跟實!

「以爲會好難攞簽證,點知喺北韓領事館隻被問了幾條簡單問題就順利入境。」

到達平壤,由機場前往羊角島國際飯店Check-in,導遊都貼身跟實,「臥底」這刻完全感受到北韓人民全面被監視的痛苦。

「臨瞓前,忍唔住喺酒店門口放低幾條底褲影相,當然惹來側目!」

Day 2 觀光篇 | 開始派底褲任務

「行程第二日去咗一個廣場,嘩,我成世人見過最大的雕像就係佢──金正日和金日成,仲大座過巴黎鐵塔!」

「到依家一條底褲都派唔出,望住滿床底底,開始擔心完成任務的可能性。」

出動撒手鐧!

「我放低條紅底喺酒店走廊後速逃,無論任何人叫都決不回頭!」

Day 3 校訪篇 | 30位學生爲一人表演

「今日行程是參觀中學,唔知學生會問咩呢?最後竟然是30位中學生爲我一位訪客表演,對於害羞的瑞典人如我,成世人最尷尬就係呢刻!」

「表演完後在學校行個圈,以爲有機會同學生接觸,可惜在導遊監視下,淨係可以影張相。」

Day 4 遊玩篇 | 北韓市民欣然接受「紅底」

「去打保齡球時,導遊金先生雖然肯接受我條紅底,但堅決唔肯拎住上鏡,亦唔肯同我一齊影,佢話國家唔畀喎!」

「平壤的地標凱旋門,比巴黎那座高多3米,遠睇好浮誇。」

「再次被安排去打波,民調講得好,北韓人真係好需要多點情趣!」

「在公園參觀時終於見到北韓市民,好幸運,當我靜雞雞派出紅底時,當地人都肯接受,但都係堅決唔肯合照。」

Day 5 找數篇 | 完成歷史任務!

「來到最後一日,我決定將剩下的底底留畀執房的服務員。」

「浴室當然唔放過!」

「最後我將底褲由酒店41樓掉落街,總算完成呢項曆史任務!」

30 秒任務短片重溫:

https://www.youtube.com/watch?v=kKyPLtUmEuo