免費都唔想再去兩大 香港樂園 | 藍橘子

環境惡劣 垃圾滿瀉冇人理

海洋公園環境愈來愈污糟，廁所臭氣沖天，周地都係垃圾，餐廳嘅枱長期冇人執，亦因為供過於求，大家都轉移到附近可以坐到嘅地方開餐。但食完嘅垃圾可唔可以執番好，或者將個餐盤放番去職員可以見到嘅地方呢？

笑容漸失 歡樂氣氛不再

而迪士尼樂園賣點唔係機動遊戲，而係氣氛。不過最近一次去已經感受唔到歡樂氣氛，好多職員已經唔識笑，至少冇日本做得咁好。

海洋公園處理打尖效果佳

不過海洋公園值得一讚嘅係，佢哋職員對於捉排隊打尖嘅人捉得好嚴，唔知係當日我遇到嘅職員比較好火氣，定係有規定咁做，當個職員發現有人打尖，會立即用「大聲公」喝止，仲會走入人群，將打尖嘅人送番去隊尾。呢方面迪士尼樂園就做得比較差，職員好多都隻眼開隻眼閉，就算見到打尖嘅人喺前面經過，職員都無動於衷，繼續機械式指揮人群。

點知！！當條人龍開始移動，大媽竟然好似隻狗咁烏低身竄向前……一眨眼佢已經消失咗喺排隊人龍之中，我想阻止都阻止唔到佢。前面嘅職員亦冇阻止佢，最後只可以眼白白咁望住佢排到最前，搵佢個「消失的兒子」。

巡遊爭最佳位置 批踭伸腳奇招百出

去到夜晚睇巡遊，強國人係唔會理有冇人坐喺路邊。佢只會當你透明，只要佢想橫過對面，就會一隻腳伸埋嚟，試圖跨過你個人。又或者，佢哋唔會理前面有冇位企，都會強行企去你前面，一個批踭將你批開，霸佔最佳位置，迫你退後。

當大家唔想被打尖，就自然會對其他人有所防範。若果被人喺頭頂跨過你，或者見到有人吐痰亂掉垃圾，你只會惡言相向，或者黑晒口面，甚至誇張少少繼而動武。不知不覺間，你亦會變成一個冇禮貌嘅人。有咩方法可以改變？其實冇……你可以做嘅，就係以後都唔去，或者包容下囉……

專頁：http://www.facebook.com/BlueGodZi
Ig：BlueGodZi