相信唔少搭過飛機嘅人都會認同,飛機經濟客艙入面每一行座位之間的距離好狹窄,如果前面個椅背挨後多少少,後面嗰位乘客就分分鐘連企都企唔到起身。喺飛機上面的生存空間仲狹窄過喺香港呢個城市本身呀!為此,時不時會有網民討論飛機椅背挨後呢個問題。

撰文:業餘空少飛Sun | 圖片:新傳媒資料庫、Cuson LO & Expedia 插圖

長途機常見「飛機椅背後靠」

飛咗差唔多五年,touch wood 唔係遇過好多次乘客因為飛機椅背挨後嘅問題而發生爭執,數埋應該都冇五次。可能因為一直飛長途機比較多,餐與餐之間平均冇十個都有八個鐘,各位乘客通常都希望可以挨低個椅背瞓得舒服少少。

以下 2 個情況下,椅背絕不可以後靠

情況 1:用餐時

其實喺用餐嘅時候,空姐空少一般都會要求前排乘客校直番椅背,確保後排乘客有足夠空間進食。

情況 2 : 起飛及降落

另外就係起飛同降落嘅時候,會基於安全理由要求所有乘客校直個椅背,因為,如果個椅背唔係豎直狀態時,有機會因為起飛降落時嘅衝力彈番直而傷到座位上嘅乘客。

另外就係萬一不幸發生任何意外需要緊急逃生時,椅背挨後會阻礙到後座乘客逃生。因此,各位空服員起飛降落之前,都會化身飛行安全大使嚴格執行呢個規定,如果個座位發生故障唔能夠豎直椅背,航空公司係唔可以賣嗰個座位畀乘客嘅。

「唔挨後係人情,挨後係道理。」

至於喺上述情況以外嘅時候,挨唔挨後個椅背還是挨後幾多,就完全係乘客嘅個人選擇喇!空服員係完全冇權去干涉。雖然我唔係飛機座椅權威專家,但係既然張椅係設計成可以挨後的話,乘客如果將張椅挨後,都只不過係行駛緊佢嘅基本權利。

挨到幾後?視乎雙方需要

不過,至於挨到幾後又真係應該視乎實際情況嘅。如果見到坐後面嘅乘客身形比較圓潤又或者高大,我都會盡量留番多少少位畀佢。大家搭埋同一班飛機都叫做有緣,自己舒適之餘,都唔好令到其他人太不適吖嘛!祝咁多位讀者下次搭飛機都有個舒適愉快嘅旅程啦!

個案分享:千祈唔好踢人哋椅背!

最後講番上面踢人哋椅背嗰位乘客,其實原本只係兩位乘客口舌之爭,我哋作為空服員最多都只會出面做和事佬叫大家一人少句,但係當佢做出踢椅背呢種滋擾到其他人的行為時,我哋就一定要出口頭甚至係書面警告喇!

後果就係如果再唔合作就有機會被航空公司 blacklist,如果乘客本身係要轉機的話,分分鐘唔能夠繼續餘下嘅旅程添。為啖氣搞到去唔成旅行或者返唔成屋企,點都唔值得啩!所以,無論你幾唔鍾意人哋挨後個椅背都好,記住千祈唔好踢人哋椅背呀!