早前中國麥當勞推出創新桃花味雪糕!編輯有幸地在新年假期試到新口味!除咗甜筒,桃花雪糕仲可以揀新地或者麥旋風,聽講單身食完有拖拍,而家仲要買兩杯半價!

 

大年初一,小區入面嘅麥當勞仍然有營業。

店內亦有桃花雪糕嘅宣傳,當日眼見大部份人都食緊杯桃花雪糕,諗住唔會太伏啦,於是一次過點晒 3 款嚟試。

1)甜筒:貨不對辦

拎到手後發現同宣傳品上有出入!雪糕有色差都算,俾番個粉紅色雪糕筒我呀!

2)麥旋風:看似最正常

淡粉紅色配Oreo,望落去又OK,唔知食落去點呢?

3)新地:桃花味配草莓汁

望落好伏,草莓汁感覺膠膠地!本來個店員介紹我落朱古力汁,最後都係揀士多啤梨,希望無揀錯啦!

下一頁:大人話伏,細路竟話好味?

甜筒:

呢杯桃花甜筒,味道似色素,帶點膠味,仲滲以假花嘅香味,一個字,怪!

伏味:★★★☆☆

麥旋風:

小朋友話好好味,甜甜的,同平時嘅麥旋風分別不大!編輯則認為桃花味過濃,無晒Oreo味,淡番少少會再好味D!

伏味:★★☆☆☆

新地:

本身個草莓汁都假假地,再配上又係人造色素味嘅雪糕,伏中之伏!不過小朋友又係覺得好好味,唔通大人同細路嘅口味真係差咁多?

伏味:★★★★☆

總結:平時接受到色素味甜品嘅可以一戰!最好揀麥旋風,伏味最細!不過唔好期望會食到桃花味啦!

延伸閱讀:

麥當勞搶眼新包裝!2016 登陸香港?

新年Happy Meal | Monchichi VS 功夫熊貓,港中麥記換公仔

Happy Meal 2016 | 中、 日、韓、台開心樂園餐,今期換緊乜?

期間限定|日本麥當勞推「黑白薯條」Mac Choco Potato