「街頭表演」可能喺好多香港人心目中，已經變成「噪音」嘅代名詞。但其實好多國家/地方都一樣有同類表演，如台灣西門町、韓國弘大、日本街頭，外國更加去到邊都見得到……
圖片來源：新傳媒資料庫、TVB《東張西望》、Naver
申請合法表演牌照，就可以解決噪音問題？
我每次見到有呢類表演，都會停留聽一陣。並唔係話隔籬飯香，就算係外國人都有低質嘅表演者。但對於大媽歌舞團，我真係連一秒都忍受唔到。
到底兩者嘅分別喺邊呢？雖然好多網民都建議應該向表演者發出牌照，但再諗深一層，乜各位真係信得過評核表演者嘅部門咩？
雖然大媽歌舞團令人討厭，但唔知大家有冇發現，每檔大媽都擁有非常多嘅支持者，佢哋會舉牌應援，聞歌起舞，仲會封利是畀大媽表演。
所以，以粉絲作為評定準則亦唔可行。
大媽歌舞同其他國家街頭表演最大分別，係「音量」同「自律性」
其他國家嘅表演者即使係樂器，都會盡量控制聲量，只要你稍微行開少少，就只會聽到近乎人聲嘅聲量。另一方面，表演者亦唔會霸佔太多地方。
由於聲量唔大，人群就需要緊密圍圈，避免阻塞通道，你只會感覺氣氛開心又舒服，而唔係嘈吵煩厭。當然，除咗有一系列規則，仲需要表演者同觀眾自律。
我住過一段日子旺角，正正喺行人專用區樓上。每逢星期六、日，就算閂晒窗都一樣聽到極大聲嘅演唱會，最頂癮係由於兩旁都係大廈，啲歌聲撞來撞去，我街尾都可以清楚聽到街頭唱乜。
現時大媽轉移陣地去尖沙咀，亦有喺銅鑼灣出現。我唔能夠話佢哋唱得難聽，所以反對佢哋繼續唱，但相信如果唔識自律，無論用咩法例規限都冇用。