文：景點起底王
01 | 重本！西班牙、帛琉取景
全智賢做美人魚雖然靚爆，但都要搵個有番咁上下分量的海洋做布景先襯托出個氣氛。預告中見到李敏鎬坐在岸邊望住個藍色大海，就係劇組早前於 8 月底及 9 月前往帛琉、西班牙拍攝的海外戲分，返到韓國之後，亦飛到濟州島海邊繼續進行拍攝。 靚人靚景，似乎應該不輸年初播出《太陽的後裔》的希臘外景。
02 | 奇幻！故事來自韓版《聊齋》
故事取材自韓國首部野史集《於于野潭》其中的一篇「人魚傳說」，講述朝鮮時代一個峽谷縣令金聃齡將漁夫捕到的人魚重新放回大海的故事。李敏鎬將會一人分飾兩角，分別做縣令個仔金武，另一個角色就係現代韓版《Catch Me If You Can》的天才騙子許俊才，扮鬼扮馬去呃人，然後就梗係命運安排愛上咗有「宿世姻緣」的美人魚全智賢喇！
03 | 強勁！《星星》編劇班底
編劇係寫過《來自星星的你》、《製作人》的朴智恩，今次劇本都係同《星星》一樣取材自古代民間傳說。編劇仲話構思劇本時，就已經用李敏鎬、全智賢本人去設計人物角色， 令人相當期待編劇繼千頌伊之後，如何再引發全智賢的暴風爆笑演技！
04 | 期待！11月中，韓國首播
《藍色海洋的傳說》即將於11 月 16 日在韓國 SBS 台首播，接檔另一韓劇女王孔孝珍主演的《嫉妒的化身》逢星期三、四播出。新劇同當年《星星》播出的檔期差唔多，都係由年尾播到出年年頭，橫跨聖誕、新年假期，放假又可以喪煲劇喇！
05 | 邊拍邊播 海外難同步
雖然電視台未有公布劇集的製作形式，不過 10 月頭劇組首次在韓國讀劇本，估計係先拍攝完海外戲分，其餘集數都係邊拍邊播，即係韓國以外地方同步播出的機會好微，等睇字幕版起碼要隔幾個鐘，不過仲未有香港版權。好處係可以保留劇情原汁原味，避免好似韓版《步步驚心》海外播放時被剪到支離破碎的情況。
06 | 搏命！女神生完即拍劇
全智賢今年 2 月中先生完個仔，計埋坐月唞唔夠 3 個月就宣布接拍新劇，個仔啱啱滿半歲就已經出發飛去西班牙拍外景。劇中要做美人魚，唔止落水戲分多，睇預告仲成日要打出個膊頭、性感示人，為咗做條靚人魚，全智賢9 月已經開始練水，為求演得更加神似。以全女神嫁得咁好的少奶奶命格來講，絕對係搏到盡！
07 | 女神揀劇本 100％命中
明年就出道 20 年的全智賢，主力拍電影，電視劇產量勁少。2013 年《星星》係女神正式擔正的第一部電視劇，一擊即中，憑千頌伊一角搞笑形象再度紅爆全亞洲。據聞全智賢今次都係因為對《星星》編劇有信心，所以先爽快應承拍劇！
去片：