以近日熱到想裸跑嘅天氣,半夜又成日落大雨,係曱甴出沒嘅高峰期。雖然我好想消滅曱甴,但作為一個男子漢唔怕同大家講,我真係好驚曱甴!

簷篷雨水照頭淋 變曱甴沖身

事緣係十幾年前我仲係一個中學雞,有一日放學喺小巴站等緊車,當時落緊豪雨,小巴站旁邊係一大堆街邊攤販。

突然,頭頂簷篷受唔住雨水負荷,一灘水兜頭淋咗落我度。我身後排緊隊個阿叔突然彈開,指住我大叫:「嘩!哥仔!你個身好X多曱甴!」

我低頭一望,真係好X多隻曱甴抓住我件衫!

命運弄人 愈怕曱甴愈易遇到

嗰一刻,我全身每寸毛孔都喺度講緊粗口,大家都知曱甴敏捷度有幾高,抓力又強,我完全趕唔走佢哋,我直頭有衝動想瞓喺地下翻滾,嚟個玉石俱焚。

最後,曱甴蹂躪完我一輪,先依依不捨咁離開。呢件事之後,我就好怕曱甴。

但可能呢啲就係命運,我咁驚曱甴,偏偏屋企就好多曱甴。

曱甴最愛躲藏處是……

我試過不下十次,朝早返工著鞋時,一穿隻腳入去先發現入面有隻曱甴。佢喺我腳趾縫之間爆裂開嗰種觸感,一世都唔能夠忘記。

點解激發起我要寫呢篇文章?原因就係因為昨晚,我沖完個靚涼,爽歪歪抹乾個身,著返條底褲先發現……我屁股好似有嘢喺度掙扎緊!!

根據我人生經驗,唔使半秒已經知道嗰隻係曱甴!哈哈哈哈哈,我著住一條有曱甴嘅底褲啊!

我只係冇戴眼鏡,浴室又煙霧瀰漫,冇檢查清楚啫!唔通咁都有錯?嗰一刻,我真係想一下撕走成塊屁股皮唔要掉落垃圾桶,然後大叫:「哈哈哈,你今次仲唔死!」

但現實嘅我,係閉起雙眼除番條底褲,衝入浴缸清潔兇案現場(屁股),然後將有曱甴嘅底褲掉落垃圾桶。

勤清潔冇幫助 放置滅曱甴神器

由細到大,我屋企都成日見到曱甴,我發覺就算我勤做家務,每晚倒垃圾,將屋企清潔得乾乾淨淨,曱甴數目都有增無減。

我曾經要求父母不如搵滅蟲公司,點知阿媽話:「個個屋企都有曱甴㗎啦!」

於是,我決定買幾間曱甴屋,擺喺屋企幾個曱甴熱門出沒點。我總共買咗五盒,最後一盒唔知擺喺邊度好,就擺喺自己房。

兩日後,我後悔了……

我打開間曱甴屋嚟睇,你老鹵,我間房竟然有成十幾隻曱甴!啲腳被曱甴膠黐實晒,佢哋掙扎到好似跳Disco咁un下un下。

嗰一刻我完全崩潰,我唔能夠接受瞓咗幾十年嘅房,竟然會咁多曱甴!我平時連零食都盡量唔喺房食,間房塵都唔多粒,我究竟做錯咗啲乜嘢啊啊啊啊!

我攞住間曱甴屋畀老母睇,希望爭取到幫屋企滅蟲。佢話:「你唔好擺曱甴屋咪冇事囉!反正咁多你都殺唔晒㗎啦~」

老母一句,我覺悟了!
係我多事,係我唔啱。

就算眼見住自己居住咗幾十年嘅家被昆蟲入侵,即使佢哋食我嘅飯、瞓我間房,仲周圍屙屎產卵!而你嘅下一代,仲有可能同曱甴做鄰居、做同學、做朋友添!

但只要唔聽、唔睇、唔理、扮冇事發生,照常咁樣返工放工,你依然可以活得好幸福快樂。

下一頁:原來動物園睇到嘅動物全部都係假