憑幽默爛Gag得到網民追捧的「昇爺」方東昇,入行跑新聞已經有17年,大家見佢拍攝《 世界零距離 》可以輕輕鬆鬆走訪山卡啦國家,主持另類旅遊節目之前,佢曾經擔當過好多年特派記者,隨時On Call,走遍天南地北做突發新聞,海外執生的歷煉,同佢身型一樣咁豐厚!

經典回憶 方東昇&伍晃榮

喺早年一個《新聞話事·人》節目入面,就曾經有一幕經典場面--神級主播伍晃榮,訪問當時入行7年嘅方東昇。兩代經典主播同場,場面絕對罕見:

訪問入面,伍晃榮踢爆「昇爺」有個「誇張裝備」,原來就係一個無時無刻準備海外跑新聞嘅求生背囊「百寶袋」,同旅遊記者好唔同,昇爺當年經常負責海外突發,基本上一收到Order就要買機票上機,無時間諗咁多,所以除咗passport以外,亦隨時有登機嘅準備!

薯嘜背囊,唔怕老土!

揭曉裝備之前,先講講背囊來歷--有Fans早就留意到,「昇爺」喺兩輯《 世界零距離 》的裝扮都非Old School:CCTVB風褸,加上一個薯嘜背囊,由不丹到斐濟,都係用呢個造型出入機場,統一得嚟,亦唔怕老土:

其實「昇爺」呢個「薯嘜背囊」有段古,絕對係陪佢身經百戰嘅夥伴,記者行內對佢呢個造型都非常熟悉,細心留意,其實背囊上面仲有2008北京奧運「撈稿」!

喺早年訪問入面,「昇爺」都有講過自己特別喜歡呢個奧運背囊,紀念佢2008年到北京全程採訪奧運,估唔到強國背囊可以一孭就孭足六、七年,依然陪佢遊世界(雖然無講到出口,呢位主播睇嚟同友台東方昇一樣咁愛國囉)!

《 世界零距離 III》「薯嘜背囊」第二代?

嚟到《 世界零距離 III》,昇爺終於換咗背囊,延續實用「薯嘜」精神,今次呢個都係以黑紅做主色,設計簡單唔浮誇,符合昇爺性格!如果大家夠細心,會留意到呢個其實係印有2008北京殘奧「撈稿」嘅背囊嚟架!

至於「百寶袋」有啲乜?伍晃榮即場喺觀眾面前摷「昇爺」個袋!

原來外型十足學生書包的背囊入面,有齊麵包、藥物、口罩、樽裝水,十足日本防災求生背囊一樣;翻查昇爺履歷,曾經走訪過唔少天災人禍場面,出入地震災場,仲有熱鬧到打仗一樣的台灣大選,原來就係靠呢啲基本求生裝備,同埋隨時ready走入新聞現場嘅心態:

雖然講到好專業好神奇,不過呢啲裝備對突發記者或攝影師而言,絕對係基本嘢,大家都要喺隨時候命的裝態,先可以做到好新聞。

不過話又說回來,對香港人嚟講,呢個「百寶袋」其實唔陌生,2014年佔領街頭嘅期間,唔少市民返工嘅背囊入面,都係袋住口罩、耳塞、生理鹽水,甚至頭盔都有一個!隨時作戰嘅心情,竟然普及到全民皆兵,唔知「昇爺」點睇?

去片:

http://www.youtube.com/watch?v=Xsn0B2oVuT8