如果你係一位計劃緊或將會出發去布拉格影婚紗相嘅男士,呢篇悲慘式遊記,絕對可以畀定個心理準備你。

影婚紗相前嘅行程,其實同影婚照一啲關係都冇……

我老婆豆姐話,為咗隆重其事今次嘅婚紗照,所以行程由德國作為第一站。

佢聲稱:「個個都係咁㗎!影婚紗相一定要咁去㗎!」

我衰在太懶,冇自己搜集行程,所以信咗佢,由第一站慕尼黑玩幾日,搭火車去紐倫堡,幾日後再去柏林,最後先去布拉格。

事後,我發現同影婚照一啲關係都冇……

旅程要攞住三套婚紗,每次轉酒店都化身駝獸

去旅行唔緊要,當順路玩多幾個地方,但最大問題係全程攞住啲婚紗!

唔單止超級重,婚紗仲非常霸道,三套婚紗加禮服已經霸咗一個三十吋行李箱,仲未計其餘日常衫褲鞋襪,每次轉酒店我都攞到成隻駝獸咁。

由於每一程都搭火車,我建議網上訂車票時,一定要畀多少少錢訂埋座位!因為遠程火車係會滿座,而且好有可能連行李箱都冇位放,咁你就需要攞住啲行李,企足幾個鐘。

攞重嘢都唔緊要,豆姐話驚影婚紗相前會肥,日日清茶淡飯,返到酒店就做運動。亦因為咁,我失去咗旅行嘅唯一樂趣,就係食……

妄想成為韓國oppa,新郎打扮只需 5 分鐘

終於去到影婚紗相當日,約咗化妝師早上3點鐘去佢酒店化妝。前一晚心情緊張,完全瞓唔著,成晚發夢喺度擺pose,眨下眼就要起身出發。

豆姐一去到化妝師酒店,就開始化妝,而作為男人……由於你已經換好晒禮服先出門口,所以你唯一需要做嘅,就係企喺度等佢化妝。

本來我以為可以瞓陣補一補充精神,點知呢個時候,豆姐已經開始自我感覺良好,猛咁叫我影佢被化妝嘅情況。

化完隻眼又影,搽完粉底又影……平時我都唔太理解女仔點解要化妝咁耐,而化新娘妝係需要兩倍時間。

差不多5點鐘天光,豆姐終於都化完妝,換上一套靚靚嘅婚紗。

「新郎哥,你都要化一化妝,坐過嚟吖!」化妝師。

我見女仔都化咁耐,有一瞬間我以為自己會化到成個韓國oppa一樣,點知唔夠5分鐘,化妝師就話搞掂……而呢個,只係全日被無視嘅開端。

主角是新娘 新郎慘變陪襯品

「影婚紗相」顧名思義係影婚紗,同埋著住婚紗嘅新娘,其他所有嘢都係陪襯品,包括新郎在內。

每去到一個景點,攝影師都會話:「新郎哥,你行一行開先,有需要再叫你埋位。」然後幫新娘影好多好多張獨照。

十分鐘之後,攝影師終於嗌:「新郎哥!入鏡吖!」

終於我都等到發揮機會,埋到去梗係盡情咁chok啦大佬!不過咁,原來婚紗攝影同平時去旅行影相完全唔同。

你覺得型嘅表情,影出嚟係傻仔嚟。
你覺得型嘅pose,影出嚟好似小學雞咁。

但攝影師教我哋擺嘅pose呢,平常人係唔會咁企,隻手擺嘅位置又相當唔自然,但你又吹佢唔脹,因為影出嚟真係最好睇。

雖然角色像拍戲「臨記」,但娶到靚老婆非常幸福

喺攝影開始之前,豆姐千叮萬囑要我幫佢影相,明明已經有攝影師,但佢話想我用手機,影埋個攝影師同埋被攝影師影緊嘅佢……

當需要轉移攝影地點,我嘅作用就係攞住豆姐勁誇張嘅裙尾,佢行去邊我就跟住去邊,幸好有租車,布拉格啲街道凹凸不平,少啲平衡力都唔掂。

「不如你影一張,你幫我攞裙尾嘅相吖~」豆姐。
「吓!咁都影?」
「好sweet啊~」
「好啦好啦!」

由早上5點一直影到下午4點,笑到臉部肌肉抽筋。而我全日嘅工作就好似拍戲嘅臨記一樣,攝影師叫就埋位,冇咩做就睇下風景……

雖然成個過程好攰,但我得到嘅唔係一個飯盒,而係一個靚靚老婆。做男人嘅,見到個老婆睇番相時嘅滿足樣,幾辛苦都值得。

所以,畀定心理準備各位男士,影婚紗相當日,你老婆會好靚,你會覺得娶到呢個女人,非常幸福。