夏天係薰衣草的季節，網上不時有人大晒普羅旺斯的紫色花海美照，又確係好吸睛！但要呃like，真係要飛到法國咁遠咩？答案係「不」……如果你夠勇氣的話。事關強國都有 薰衣草園 ！敢想敢做的東北人前年將薰衣草帶到瀋陽，開墾出足有20 個維園大的草園，除了薰衣草、鼠尾草，還有向日葵及各種繡球花，密密麻麻堆滿山頭！內地遊客當然聞風而至，原來本港旅行社亦有辦團前赴當地！經過本刊勇士親身查探，人工 薰衣草園 6大驚嚇位，茶餘飯後睇，包你笑到喊！

撰文：GOtrip編輯部｜圖片：相關機構、互聯網

01 │ 山寨白雪公主

薰衣草園 的山坡之上有個巨型白雪公主像，十足沙田望夫石守望山下田園，睇盡萬千癡男怨女。當然公主像本身也是景點，經常有人跑到裙底取景……

02 │ 超O嘴 5米大O字

薰衣草園 內有「L.O.V.E. 」四粒5米大字板轟然聳立於山坡前，懶理身邊人是真情定假意，內地同胞到此一遊最愛在字下留影，真係……使唔使咁露骨啊？

03 │ 景區硬套外國地名

要打造成歐風模樣，當然要額外添置布景增加投入感。 薰衣草園 在人造事業方面可謂不遺餘力，風車布置和畫框等自是指定動作，就連景區名稱都刻意選用維也納、普羅旺斯來名命，先叫人大開眼界！

04 │ 別墅式野外廁所

遠看過去好似瑞士小木屋別墅，走近一看才知真面目是座廁所。記者親身試用，衛生條件良好，其實荒山野嶺唔使野外露出已經好好。

05 │ 皇室伉儷駕臨東北

瀋陽果然是帝王之地，除了大清天朝發祥於此，就連隔個海英吉列帝國的新婚紙板都要在 薰衣草園 插旗。邊個話中國人民反對帝國主義？

06 │ 原來未執！

睇完頭幾點，其實最驚嚇的，可能是人工 薰衣草園 竟然屹立至今，經過了兩年時間都仲「健在」！平心而論，園內不少場景的確狀甚騎呢，但取景設施都尚算齊全，加上每日定時都有專車從瀋陽市內接送到埗，在內地已經算是貼心服務！ 仲有……多得各種美圖軟件，依家網上騙案層出不窮，有興趣的，不妨到此一遊，打卡北海道或普羅旺斯，話唔定可以瞞天過海呢！

瀋陽紫煙薰衣草莊園

地址：遼寧瀋陽市瀋北新區馬剛鄉馬泉溝
交通： 瀋陽市市府廣場金融大廈前，半小時一班專車接駁（7:00am-9:00am及1:00pm-2:00pm）
開放時間： 星期一至五9:00am-6:00pm，星期六及日8:30am-7:00pm
收費：¥60/人
電話：+86 – 414 – 6358008
網址：www.loveziyan.com