上星期，同女朋友豆姐去咗AIA嘉年華。仲記得上一次去AIA嘉年華已經係好多年前嘅事，今年再踏足嘉年華，真係桃花依舊面目全非。我係講緊我自己，呢鋪唔認老都唔得……
去AIA嘉年華，男友慘變「機動遊戲白老鼠」
話說女朋友有個好變態嘅癖好，就係自己唔敢玩AIA嘉年華嘅機動遊戲，會叫我自己一個上去玩，一來可以測試下驚唔驚，二來聽我旁述玩後感當自己玩咗。
唔知係咪人大咗，叔叔依家受不了太刺激嘅機動遊戲，排緊隊時已經心跳加速。偶爾聽到尖叫聲好快速咁從天而降，高速掠過耳邊再彈番上半空……
今時唔同往日！做「勇士」要趁後生
「不如……我哋玩AIA嘉年華嘅攤位遊戲，係咪仲開心呢？」我。
「吓！點解唔玩啊？」豆姐。
「因為……我驚。」我。
「唔係嘛！你以前都唔驚玩機動遊戲嘅～」豆姐。
老老實實，啱啱識女朋友嗰陣，有邊個男人唔會扮大膽？！回想當年無論去到邊個遊樂場，我都會玩晒所有機動遊戲。
但依家……叔叔不行了！
為咗唔玩可以去到幾盡……
不過我總唔能夠同女朋友講，以前只係逞強扮晒勁，於是我同佢解釋：
「即係咁，我覺得條命重要過以前好多……嗱你諗下，如果我有咩意外，邊個照顧你？邊個陪你白頭到老？！我而家出街過馬路，都會望左再望右再望番左，你就知我幾顧及人身安全啦！」
「你講到咁……咪去玩攤位遊戲囉！」
「係喇！咁樣大家先開心嘛！畀你見識下『拋波波鬼見愁』嘅厲害吖～」
轉戰AIA嘉年華攤位遊戲
用晒廿個金幣，幾乎咩攤位都試過，最後都只係贏到幾個細獎……順帶一提，有關機動遊戲，我同豆姐只係玩咗碰碰車！
唉！可能呢種係男人天性，總係鍾意喺女人面前認叻。
而女人嘅天性，即使明知佢吹牛，都總係相信身邊嗰個男人。
後記：馬戲團表演好刺激！
當日受邀請睇咗AIA嘉年華嘅馬戲團表演，完場後仲有得同馬戲團表演者合照，我全程睇到手心冒汗，佢哋仲要一日表演三次，真係辛苦晒。