一年一度嘅 賞櫻 季節又到喇,雖然講起 賞櫻 ,大家第一時間會諗起日本,但其實韓國都係一個好選擇嚟。今次介紹 3 個遊首爾嘅 賞櫻 熱點,一於睇下邊個適合你行程!
圖片來源:韓國觀光公社
1. 汝矣島輪中路櫻花道
汝矣島輪中路經國會議事堂去韓國放送公社前嘅大道兩邊種滿櫻花,被稱為「櫻花道」,櫻花盛放嗰時,仲會形成一條壯觀的「櫻花隧道」。每年汝矣島櫻花節都會喺度舉行,遊客可以一邊喺櫻花隧道下漫步,一邊欣賞漢江景色,影靚相必去!
交通:汝矣渡口站(地鐵 9 號線)1 號出口、國會議事堂站(地鐵 5 號線)1 號出口
2. 南山公園
相信唔少人都去過南山公園,但原來櫻花盛開期間嚟呢到會睇到另一個壯麗畫面!沿住南山一條環形路行,經過南山圖書館、八角亭同國立劇場,沿路除咗見到櫻花,仲會見到杜鵑花同連翹。雖然南山公園位處海拔 262 米,但唔算難行,再加埋可以睇到漫山嘅櫻花,絕對適合一家大細櫻花季節時嚟呢度踏青。
交通:忠武路站(地鐵 3 號線或 4 號線)2 號出口,轉乘 2 號或 5 號南山循環公車,國立劇場站下車
3.慶熙大學
賞櫻 季節期間,韓國各大校園都係好去處,其中最出名嘅就係慶熙大學,哥德式建築嘅校園配上盛開嘅櫻花,個畫面靚到好似一幅藝術品咁呀!
交通:回基站(地鐵1號線)1號出口,轉乘綠色1號公車,慶熙大學站下車